തളിപ്പറമ്ബ്: കാട്ടുപന്നി കുറുകെ ചാടിയതിനെ തുടർന്ന് നിയന്ത്രണം വിട്ട ഓട്ടോ മറിഞ്ഞ് കുട്ടികള്‍ ഉള്‍പ്പെടെയുള്ള യാത്രക്കാര്‍ക്കു പരുക്കേറ്റു.
ഓട്ടോറിക്ഷാ യാത്രികരായ ഒരു കുടുംബത്തിലെ അഞ്ചു പേര്‍ക്കാണു പരുക്കേറ്റത്. മത്സ്യത്തൊഴിലാളിയായ പട്ടുവം പോത്തട മുതുകുട മടത്തില്‍ നവാസ്(36), ഭാര്യ ബുഷ്‌റ(34), മക്കളായ ആഷിഖ്(8), അല്‍ അമീൻ(5), സഹോദരിയുടെ മകള്‍ ഷഫ്‌ന(11) എന്നിവര്‍ക്കാണു പരുക്കേറ്റത്.
കഴിഞ്ഞ ദിവസം രാത്രി 11 മണിയോടെ വെളിച്ചാങ്കീലിലായിരുന്നു അപകടം. കാട്ടുപന്നി റോഡിനു കുറുകെ ചാടിയതോടെ, ഓട്ടോറിക്ഷ മറിയുകയായിരുന്നു . നവാസായിരുന്നു ഓട്ടോ ഓടിച്ചത്. നിലവിളി കേട്ട് ഓടിയെത്തിയ നാട്ടുകാരാണ് ഇവരെ ആശുപത്രിയില്‍ എത്തിച്ചത്.
