കൊച്ചി: ക്രിസ്മസ് -പുതുവത്സര സീസണ്‍ ഇങ്ങെത്തിയതോടെ വിമാന ടിക്കറ്റ് നിരക്കുകളും ഉയര്‍ന്നു തുടങ്ങി.ക്രിസ്മസിന് ഗള്‍ഫില്‍നിന്ന് കേരളത്തിലേക്കുള്ള നിരക്ക് അഞ്ചിരട്ടിയായിട്ടുണ്ട്.
ട്രാവല്‍ ഏജൻസികള്‍ കൂട്ടത്തോടെ വിമാനടിക്കറ്റുകള്‍ ബുക്കുചെയ്യുന്നതാണ് ഗള്‍ഫിലേക്കും തിരിച്ചുമുള്ള ടിക്കറ്റ് നിരക്ക് വര്‍ധനയ്ക്കു കാരണമായത്.ഓണം, പെരുന്നാള്‍, ക്രിസ്മസ്, വേനലവധി കാലത്താണ് ഏജൻസികളുടെ ഈ തന്ത്രം.
ദുബായിലേക്ക് നിലവില്‍ 11,000 രൂപയാണ് കോഴിക്കോട്ടുനിന്നുള്ള നിരക്ക്. ഡിസംബര്‍ അവസാനത്തോടെ ഇത് 27,468 രൂപയായിട്ടുണ്ട്. തിരിച്ച്‌ 7,066 രൂപ മുതലുള്ള ടിക്കറ്റിന് 17,000 മുതല്‍ 90,000 രൂപ വരെയായാണ് ഉയരുന്നത്. അബുദാബിയിലേക്ക് 10,284 രൂപയുള്ളത് 28,647 രൂപയായി ഉയര്‍ന്നുകഴിഞ്ഞു.
തിരിച്ച്‌ 11,934 രൂപയുള്ളത് 30,638 രൂപ വരെ ഉയരും. ഷാര്‍ജയിലേക്ക് 12,070 രൂപയുള്ളത് 32,159 രൂപയായും തിരിച്ച്‌ 7,859 രൂപയുള്ളത് 46,350 രൂപയായും ഉയര്‍ന്നു. വരുംദിവസങ്ങളില്‍ ഇത് ഒരു ലക്ഷത്തിനു മുകളിലെത്തിയാലും അത്ഭുതപ്പെടാനില്ല.
