മലപ്പുറം: മലപ്പുറം ചങ്ങരം കുളത്ത് യുവാവിനെ ലഹരി മാഫിയാ സംഘം കാറില്‍ തട്ടിക്കൊണ്ടുപോയി മര്‍ദിച്ചതായി പരാതി. കാഞ്ഞിയൂര്‍ സ്വദേശി അനസിനാണ് മര്‍ദനമേറ്റത്. കാറില്‍ നിന്ന് പുറത്തേക്ക് ചാടി രക്ഷപ്പെട്ട അനസിനെ ചങ്ങരം കുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു.
സുഹൃത്തിന് നല്‍കിയ വാഹനം തിരികെ വാങ്ങാനായി കഴി‍ഞ്ഞ ദിവസം രാത്രി എട്ടരയോടെ മാറഞ്ചേരിയിലെത്തിയപ്പോഴാണ് കാഞ്ഞിയൂര്‍ സ്വദേശിയായ അനസിന് നേരെ ആക്രമണമുണ്ടായത്. ഒരു സംഘം സ്ഥലത്തെത്തി അനസിലെ ബലം പ്രയോഗിച്ച് കാറില്‍ കയറ്റിക്കൊണ്ടുപോയി മര്‍ദിക്കുകയായിരുന്നു. കാര്‍ അതിവേഗം ഓടിച്ചു പോകുന്നതിനിടെ ഡോര്‍ തുറന്ന് അനസ് പുറത്തേക്ക് ചാടി. പരുക്കേറ്റ അനസിനെ നാട്ടുകാര്‍ ചങ്ങരം കുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു.
