ഇടുക്കി:വീട്ടില്‍ നട്ടു വളര്‍ത്തിയ കഞ്ചാവ് ചെടികളുമായി യുവാവ് അറസ്റ്റില്‍.രാജക്കാട് പള്ളിക്കവല മാണിപ്പുറത്ത് സനീഷ് എം.ജി(27) ആണ് പിടിയിലായത്.
രഹസ്യ വിവരത്തെ തുടര്‍ന്ന് അടിമാലി നാര്‍ക്കോട്ടിക് എൻഫോഴ്സ്മെന്റ് സ്ക്വാഡിലെ സര്‍ക്കിള്‍ ഇൻസ്‌പെക്ടര്‍ കെ രാജേന്ദ്രനും സംഘവും ചേര്‍ന്ന് നടത്തിയ പരിശോധനയിലാണ് ഇയാളുടെ വീടിനോട് ചേർന്ന് കഞ്ചാവ് ചെടികൾ കണ്ടെത്തിയത്.രാജാക്കാട് പഴയ വിടുതി കോളനി ഭാഗത്തായിരുന്നു സംഭവം.
നട്ടുവളര്‍ത്തി പരിപാലിച്ചു വന്നിരുന്ന 246 സെന്റീമീറ്റര്‍ നീളമുള്ള വലിയ ചെടിയും 66 സെന്റീമീറ്റര്‍ നീളമുള്ള മറ്റൊരു ചെടിയുമാണ് സനീഷിന്റെ വീട്ടില്‍ നിന്നും എക്‌സൈസ് സംഘം കണ്ടെത്തിയത്. കഞ്ചാവ് ചെടി നട്ടു വളര്‍ത്തുന്നത് പത്ത് വര്‍ഷം വരെ തടവ് ശിക്ഷ ലഭിക്കാവുന്ന കുറ്റമാണ്. പ്രതിയെ അടിമാലി കോടതിയില്‍ ഹാജരാക്കിയ ശേഷം റിമാൻഡ് ചെയ്തു.
