വിജയ് ആൻറണി സംവിധായകനായി അരങ്ങേറ്റം കുറിക്കുന്ന പിച്ചൈക്കാരൻ 2 ൻറെ ട്രെയ്‍ലർ പുറത്തെത്തി. 2016ൽ പുറത്തെത്തിയ പിച്ചൈക്കാരൻറെ സീക്വൽ ആണിത്. വിജയ് ആൻറണിയുടെ കരിയറിലെ ഏറ്റവും വലിയ ഹിറ്റുകളിലൊന്നായിരുന്ന പിച്ചൈക്കാരൻറെ രചനയും സംവിധാനവും ഗുരുമൂർത്തി ആയിരുന്നു. തമിഴിന് പുറമെ ‘ബിച്ചഗഡു’ എന്ന പേരിലെത്തിയ തെലുങ്ക് മൊഴിമാറ്റ പതിപ്പും വലിയ ഹിറ്റ് ആയിരുന്നു. തെലുങ്ക്, ഹിന്ദി മൊഴിമാറ്റ പതിപ്പുകൾക്കു പുറമെ ചിത്രം ഒഡിയ, മറാത്തി, കന്നഡ ഭാഷകളിലേക്ക് റീമേക്ക് ചെയ്യപ്പെടുകയുമുണ്ടായി. പിച്ചൈക്കാരൻ 2ൻറെ രണ്ട് മിനിറ്റോളം ദൈർഘ്യമുള്ള ട്രെയ്‍ലർ ആണ് പുറത്തെത്തിയിരിക്കുന്നത്.
മികച്ച തിയറ്റർ അനുഭവം പകരുന്ന ചിത്രമായിരിക്കും ഇതെന്ന പ്രതീക്ഷ ഉണർത്തുന്നതാണ് ട്രെയ്‍ലർ. ചിത്രത്തിൻറെ പ്രഖ്യാപനവേളയിൽ ദേശീയ പുരസ്കാരം നേടിയ സംവിധായിക പ്രിയ കൃഷ്‍ണസ്വാമി ചിത്രം സംവിധാനം ചെയ്യുമെന്നാണ് പറഞ്ഞിരുന്നത്. എന്നാൽ അഭിപ്രായവ്യത്യാസങ്ങളെത്തുടർന്ന് അവർ പിന്മാറുകയും ‘കോടിയിൽ ഒരുവൻ’ സംവിധായകൻ അനന്ദകൃഷ്‍ണൻ പകരം എത്തുകയും ചെയ്‍തു. ആ തീരുമാനവും മാറ്റിയാണ് വിജയ് ആൻറണി തന്നെ സംവിധാന സ്ഥാനത്തേക്ക് എത്തിയത്.
വിജയ് ആൻറണി ആദ്യമായി ഒരു സിനിമയുടെ രചയിതാവാകുന്ന ചിത്രം കൂടിയാണ് ഇത്. വിജയ് ആൻറണി ഫിലിം കോർപ്പറേഷൻറെ ബാനറിൽ നായകൻ തന്നെ നിർമ്മിക്കുന്ന ചിത്രം തമിഴിലും തെലുങ്കിലുമായി ഒരേ സമയം പൂർത്തിയാക്കും. ‘ബിച്ചഗഡു 2’ എന്നായിരിക്കും തെലുങ്കിലെ പേര്. ഇതിൻറെയും ട്രെയ്‍ലർ ഒരേസമയം പുറത്തെത്തിയിട്ടുണ്ട്. സംഗീതവും വിജയ് ആൻറണി തന്നെ നിർവ്വഹിക്കുന്ന ചിത്രത്തിൻറെ ഛായാഗ്രഹണം തേനി ഈശ്വർ ആണ്. കാവ്യ ഥാപ്പർ, ഡാറ്റോ രാധാ രവി, വൈ ജി മഹേന്ദ്രൻ, മൻസൂർ അലി ഖാൻ, ഹരീഷ് പേരടി, ജോൺ വിജയ് തുടങ്ങിയവരാണ് മറ്റു താരങ്ങൾ.
