കാസര്‍കോട്: പ്രധാനമന്ത്രി രാവിലെ തിരുവനന്തപുരത്ത് ഫ്ലാഗ് ഓഫ് ചെയ്ത വന്ദേ ഭാരത് എക്സ്പ്രസ് ഉദ്ഘാടന യാത്ര പൂര്‍ത്തിയാക്കി ആവേശം വിതറി കാസര്‍കോട്ടെത്തി. റെയില്‍വേ സ്റ്റേഷനില്‍ ആവേശോജ്വല സ്വീകരണമാണ് വിവിധ രാഷ്ട്രീയ പാര്‍ട്ടികളുടെയും സംഘടനകളുടെയും നേതൃത്വത്തില്‍ ട്രെയിനിന് നല്‍കിയത്. പ്ലാറ്റ്ഫോമിലേക്ക് കടന്നുവന്ന വന്ദേഭാരതിനെ ചെണ്ടമേളത്തിന്റെയും ബാന്‍ഡ് മേളത്തിന്റെയും അകമ്പടിയില്‍ നൂറുകണക്കിന് ആളുകള്‍ ആര്‍പ്പുവിളികളോടെ വരവേറ്റു. നിരവധി ആളുകളാണ് സാക്ഷിയാവാന്‍ തടിച്ചു കൂടിയത്.
രാവിലെ 11.30 മണിയോടെ പ്രധാനമന്ത്രി ഫ്ലാഗ് ഓഫ് ചെയ്ത വന്ദേ ഭാരത് കാസര്‍കോട്ടെത്തിയത് രാത്രി ഒമ്പത് മണിയോടെയാണ്. അനുവദിച്ച സ്റ്റോപ്പുകള്‍ക്ക് പുറമെ കായംകുളം, ചെങ്ങന്നൂര്‍, തിരുവല്ല, ചാലക്കുടി, തിരൂര്‍, തലശേരി, പയ്യന്നൂര്‍ സ്റ്റേറ്റഷനുകളില്‍ കൂടി ഉദ്ഘാടന ദിവസമായത് കൊണ്ട് നിര്‍ത്തിയതാണ് വണ്ടി വൈകാന്‍ കാരണം. സാധാരണ തിരുവനന്തപുരം മുതല്‍ കാസര്‍കോട് വരെ ഏഴ് മണിക്കൂര്‍ 50 മിനുറ്റില്‍ എത്തിച്ചേരാന്‍ സാധിക്കും.
പ്രത്യേകം ക്ഷണം ലഭിച്ച യാത്രക്കാരും, മതമേലധ്യക്ഷന്മാരും, മാധ്യമ പ്രവര്‍ത്തകരുമാണ് ഉദ്ഘാടന ദിവസം വന്ദേ ഭാരത് എകസ്പ്രസില്‍ യാത്രക്കാരായി ഉണ്ടായിരുന്നത്. പയ്യന്നൂരില്‍ രാജ്മോഹന്‍ ഉണ്ണിത്താന്‍ എംപിയുടെ നേതൃത്വത്തില്‍ വന്ദേ ഭാരതിന് സ്വീകരണം നല്‍കി. ജനപ്രതിനിധികളും വിവിധ മേഖലകളിലെ പ്രമുഖരും സംബന്ധിച്ചു.
വന്ദേ ഭാരതിന്റെ ആദ്യത്തെ റെഗുലര്‍ സര്‍വീസ് നാളെ(ബുധൻ) കാസര്‍കോട്ട് നിന്ന് ആരംഭിക്കും. ട്രെയിന്‍ നമ്പര്‍ 20633 കാസര്‍കോട്- തിരുവനന്തപുരം സെന്‍ട്രല്‍ വന്ദേ ഭാരത് എക്സ്പ്രസ് ഉച്ചയ്ക്ക് രണ്ടര മണിക്ക് കാസര്‍കോട്ട് നിന്ന് പുറപ്പെട്ട് അതേ ദിവസം രാത്രി 10.35ന് തിരുവനന്തപുരത്ത് എത്തിച്ചേരും. മടക്ക ദിശയില്‍, ട്രെയിന്‍ നമ്പര്‍ 20634 പുലര്‍ച്ചെ 05.20ന് തിരുവനന്തപുരത്ത് നിന്ന് പുറപ്പെട്ട് അതേ ദിവസം ഉച്ചയ്ക്ക് 1.25ന് കാസര്‍കോട് എത്തിച്ചേരും.
കൊല്ലം, കോട്ടയം, തൃശൂര്‍, ഷൊര്‍ണൂര്‍, കോഴിക്കോട്, കണ്ണൂര്‍ എന്നിവിടങ്ങളില്‍ സ്റ്റോപ്പുണ്ടാകും. ട്രെയിനിന് 16 കോച്ചുകളാണുള്ളത്, അതില്‍ രണ്ടെണ്ണം 104 സീറ്റുകളുള്ള എക്‌സിക്യൂടീവാണ്. 16 കംപാര്‍ട്ട്‌മെന്റുകളിലായി ആകെ 1128 സീറ്റുകളാണുള്ളത്. വ്യാഴാഴ്ച സര്‍വീസ് ഉണ്ടാകില്ല. തിരുവനന്തപുരത്ത് നിന്നുള്ള സര്‍വീസ് വെള്ളിയാഴ്ച മുതലാണ്. ട്രെയിനില്‍ ഒരാഴ്ചയ്ക്കുള്ള ടിക്കറ്റുകള്‍ ഏറെക്കുറെ ഇതിനോടകം റിസര്‍വ് ചെയ്തിട്ടുണ്ട്. നേരത്തെ കണ്ണൂര്‍ വരെ മാത്രം സര്‍വീസ് നടത്താന്‍ തീരുമാനിച്ച വന്ദേ ഭാരത് എക്സ്പ്രസ് പിന്നീടാണ് കാസര്‍കോട്ടേക്ക് നീട്ടയത്.
