മണിച്ചിത്രത്താഴ് എന്നത് മലയാളത്തിലെ ക്ലാസിക്ക് ചലച്ചിത്രമാണ്. റിലീസ് ചെയ്ത് ഇത്രയും കാലം കഴിഞ്ഞിട്ടും ഇന്നും ടെലിവിഷനിൽ ചിത്രം സംപ്രേഷണം ചെയ്താൽ ഒന്നു രണ്ട് സീൻ എങ്കിലും കാണാത്ത മലയാളികൾ ഇല്ല. ഡോ. സണ്ണിയും, ഗംഗയും, നകുലനും, തെക്കിനിയും, നാഗവല്ലിയും ഒക്കെ ഒരോ മലയാളിക്കും സുപരിചിതം. ഒപ്പം മറ്റ് ഭാഷകളിലേക്ക് മണിച്ചിത്രത്താഴ് റീമേക്ക് ചെയ്ത് എത്തുകയും ചെയ്തിട്ടുണ്ട്. ആർട്ടിഫിഷൽ ഇൻറലിജൻസിൻറെ കാലത്ത് മലയാളിക്ക് പ്രിയപ്പെട്ട മണിച്ചിത്രത്താഴിന് ഒരു ഹോളിവുഡ് റീമേക്ക് വന്നാൽ ആരായിരിക്കും പ്രധാന നടന്മാർ എന്ന വേറിട്ട ചിന്തയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
സച്ചിൻ അനിത അനിൽകുമാറാണ് ഫേസ്ബുക്കിൽ എഐ ആപ്പായ മിഡ് ജേർണിയിൽ തീർത്ത ചിത്രങ്ങൾ പങ്കുവച്ചത്. ലിയനാർഡോ ഡികാപ്രിയോ ആണ് ഇതിൽ ഡോ. സണ്ണിയായി എത്തുന്നത്. നതാലി പോർട്ട്മാൻ നാഗവല്ലിയായി എത്തുന്നു. നകുലനായി ബ്രാഡ് പിറ്റിനെയാണ് തയ്യാറാക്കിയിരിക്കുന്നത്. നാഗവല്ലി ശത്രുവിനെ പോലെ കാണുന്ന നാട്ടുപ്രമാണി ശങ്കരൻ തമ്പിയായും ബ്രാഡ്പിറ്റിൻറെ രൂപം ഉണ്ട്.
