കൊച്ചി: സന്തോഷ് ട്രോഫി ലക്ഷ്യമിട്ടു യുവനിരയുമായി കേരളം, ടീമിനെ പ്രഖ്യാപിച്ചു, വി. മിഥുന്‍ നയിക്കും. പതിനാറ് പുതുമുഖങ്ങളുമായാണ് 76- ാമത് സന്തോഷ് ട്രോഫിക്കായുള്ള കേരള ടീമിനെ പ്രഖ്യാപിച്ചത്. വിജയത്തുടര്‍ച്ച ലക്ഷ്യമിട്ട് പുതുമുഖങ്ങള്‍ക്ക് പ്രാധാന്യം നല്‍കിയുള്ള ടീമിനെ ഗോള്‍കീപ്പറും പരിചയ സമ്പന്നനുമായ മിഥുന്‍ വി. (കണ്ണൂര്‍) നയിക്കും.
കേരള ടീം: (താരം, സ്വദേശം, ക്ലബ് എന്ന ക്രമത്തില്‍)
ഗോള്‍കീപ്പര്‍മാര്‍-മിഥുന്‍ വി. (എസ്.ബി.ഐ., കണ്ണൂര്‍), അജ്മല്‍ പി. (എഫ്‌സി അരീക്കോട്, മലപ്പുറം), അല്‍ക്കേഷ് രാജ് ടി.വി. (സായ് കൊല്ലം, തൃശൂര്‍).
പ്രതിരോധനിര: മനോജ് എം. -കേരള യുണൈറ്റഡ്, ഷിനു ആര്‍. -കെ.എസ്.ഇ.ബി., ജെറിറ്റോ ജെ. -കെ.എസ്.ഇ.ബി., ബെല്‍ജിന്‍ ബോല്‍സ്‌റ്റെര്‍-കെ.എസ്.ഇ.ബി. (എല്ലാവരും തിരുവനന്തപുരം), അമീന്‍ കെ-എഫ്‌സി അരീക്കോട്, മുഹമ്മദ് സാലിം. യു-കെ.എസ്.ഇ.ബി. (ഇരുവരും മലപ്പുറം), സച്ചു സിബി (കേരള യുണൈറ്റഡ്, ഇടുക്കി), അഖില്‍ ജെ ചന്ദ്രന്‍ (ഗോകുലം കേരള, എറണാകുളം).
മധ്യനിര: റാഷിദ് എം-കെ.എസ്.ഇ.ബി., റിസ്‌വാന്‍ അലി-എഫ്‌സി അരീക്കോട് (ഇരുവരും കാസറഗോഡ്), നിജോ ഗില്‍ബെര്‍ട്ട്-കെ.എസ്.ഇ.ബി., അജീഷ് പി. -ഏജീസ് കേരള, (ഇരുവരും തിരുവനന്തപുരം), വൈശാഖ് മോഹനന്‍ (ഗോകുലം കേരള-എറണാകുളം), ഹൃഷിദത്ത് (ഗോകുലം കേരള, തൃശൂര്‍), ഗിഫ്റ്റി സി ഗ്രേഷ്യസ് (കെ.എസ്.ഇ.ബി, വയനാട്), അബ്ദുല്‍ റഹീം കെ.കെ. (ബാസ്‌കോ എഫ്‌സി, മലപ്പുറം).
മുന്നേറ്റനിര: ജോള്‍ പോള്‍ ജെ- കെ.എസ്.ഇ.ബി., വിഗ്‌നേഷ് എം.- കെ.എസ്.ഇ.ബി. (ഇരുവരും തിരുവനന്തപുരം), നരേഷ് ബി. (മുത്തൂറ്റ് എഫ്.എ.-എറണാകുളം). മുന്‍ സന്തോഷ് ട്രോഫി താരം ഹജ്മല്‍ എസ്, ആസിഫ് ഒ.എം, ശ്രീരാജ് കെ, അര്‍ജുന്‍ വി. എന്നിവരാണു റിസര്‍വ് താരങ്ങള്‍. ബിനീഷ് കിരണ്‍ സഹപരിശീലകന്‍. ഹമീദ് കെ.കെ. ആണ് ഗോള്‍കീപ്പര്‍ കോച്ച്. കാസര്‍ക്കോട് സ്വദേശി മുഹമ്മദ് റഫീഖ് ടി.കെ.എം ടീം മാനേജര്‍.
കേരള ടീമിന്റെ പരിശീലന ക്യാമ്പ് ഒരു മാസമായി കോഴിക്കോട് നടന്നുവരികയാണ്. മേഖല റൗണ്ട് മത്സരങ്ങള്‍ക്ക് പകരം ഇത്തവണ ആറു ഗ്രൂപ്പുകളിലായാണ് ആദ്യഘട്ട മത്സരങ്ങള്‍. ഡല്‍ഹി, കോഴിക്കോട്, ഭുവനേശ്വര്‍ എന്നീ വേദികളിലാണു ഗ്രൂപ്പ് ഘട്ട യോഗ്യത മത്സരങ്ങള്‍. ആറു ഗ്രൂപ്പുകളെ നേരത്തെ പ്രഖ്യാപിച്ചിരുന്നു. ഗ്രൂപ്പ്ഘട്ട മത്സരങ്ങള്‍ ഇന്നു ഡല്‍ഹിയില്‍ തുടങ്ങും. മിസോറാം, രാജസ്ഥാന്‍, ബിഹാര്‍, ആന്ധ്രാപ്രദേശ്, ജമ്മു കാശ്മീര്‍ എന്നിവര്‍ക്കൊപ്പം ഗ്രൂപ്പ് രണ്ടിലാണ് കേരളം. 26 മുതല്‍ ജനുവരി എട്ടു വരെ കോഴിക്കോട് ഇ.എം.എസ്. കോര്‍പ്പറേഷന്‍ സ്‌റ്റേഡിയത്തിലാണു കേരളത്തിന്റെ മത്സരങ്ങള്‍.
ആദ്യ യോഗ്യതാ മത്സരത്തില്‍ കേരളം രാജസ്ഥാനെ നേരിടും. 29 നു നടക്കുന്ന രണ്ടാം മത്സരത്തില്‍ ബിഹാറാണു കേരളത്തിന്റെ എതിരാളികള്‍. പുതുവല്‍സര ദിനത്തിലും കേരള ടീമിനു മത്സരമുണ്ട്. ആന്ധ്രപ്രദേശാണ് എതിരാളി. ജനുവരി അഞ്ചിനു ജമ്മു കാശ്മീരിനെ നേരിടും. ഗ്രൂപ്പ് ഘട്ടത്തിലെ അവസാന മത്സരം ജനുവരി എട്ടിനാണ്. മിസോറമാണ് എതിരാളികള്‍.
