ചെങ്ങന്നൂരില്‍: റെയില്‍വേ സ്റ്റേഷനില്‍ അയ്യപ്പഭക്തന്‍ ട്രെയിനില്‍ നിന്ന് വീണ് ഗുരുതര പരുക്ക്. പാലരുവി എക്സ്പ്രസില്‍ യാത്രചെയ്യുകയായിരുന്ന തമിഴ്നാട് തെങ്കാശി പാളയം സ്വദേശി കറുപ്പസ്വാമിക്കാണ് (53) അരക്ക് താഴേക്ക് ഗുരുതരമായി പരുക്കേറ്റത്.
ഉറക്കത്തിലായിരുന്ന കറുപ്പുസ്വാമി ട്രെയിന്‍ ചെങ്ങന്നൂര്‍ സ്റ്റേഷനില്‍ നിന്ന് നീങ്ങി തുടങ്ങിയപ്പോഴാണ് ഉണര്‍ന്നത്. ഉടന്‍ ചാടി ഇറങ്ങാന്‍ ശ്രമിക്കുകയായിരുന്നു. ഇതോടെ ട്രാക്കിനും തീവണ്ടിക്കും ഇടയിലേക്ക് വീഴുകയായിരുന്നു.
ഉടന്‍ തന്നെ ട്രെയിന്‍ നിര്‍ത്തി ചവിട്ടുപടിഭാഗം ആര്‍.പി.എഫും അഗ്നി രക്ഷാ സേനയും ചേര്‍ന്ന് മുറിച്ചുമാറ്റി കറുപ്പുസ്വാമിയെ പുറത്തെടുത്തു. വയറിന്റെ ഭാഗത്തടക്കം ഗുരുതര പരുക്കേറ്റതിനാല്‍ കോട്ടയം മെഡിക്കല്‍ കോളജ് ആശുപത്രിയിലേക്ക് മാറ്റി. ആന്തരിക അവയവങ്ങള്‍ക്കും മുറിവേറ്റതായാണ് വിവരം.
