സുരേഷ് ഗോപി ബി.ജെ.പി ഔദ്യോഗിക ചുമതലകളിലേക്ക്; കീഴ്വഴക്കം മറികടന്ന് കോര്‍കമ്മിറ്റിയില്‍
തിരുവനന്തപുരം: മുന്‍ എം.പിയും സൂപ്പര്‍താരവുമായ സുരേഷ് ഗോപി ബി.ജെ.പി കോര്‍ കമ്മിറ്റിയില്‍. പാര്‍ട്ടി കീഴ്‌വഴക്കങ്ങള്‍ മറികടന്നു കൊണ്ടാണ് സുരേഷ് ഗോപിക്ക് ബി.ജെ.പി ഔദ്യോഗിക ചുമതല നല്‍കിയിരിക്കുന്നത്. കേന്ദ്ര നേതൃത്വത്തിന്റെ നിര്‍ദേശമനുസരിച്ചാണ് തീരുമാനം.
സുരേഷ് ഗോപി നേതൃത്വത്തിലേക്ക് വരുന്നതില്‍ സംസ്ഥാന അധ്യക്ഷന്‍ കെ. സുരേന്ദ്രനും അനുകൂല നിലപാടാണെന്നാണ് വിലയിരുത്തല്‍. സാധാരണയായി പാര്‍ട്ടി പ്രസിഡന്റും മുന്‍പ്രസിഡന്റുമാരും ജനറല്‍ സെക്രട്ടറിമാരും മാത്രമാണ് കോര്‍ കമ്മിറ്റിയില്‍ ഇടംപിടിക്കുന്നത്.
സുരേന്ദ്രനെ മാറ്റി സുരേഷ് ഗോപിയെ അധ്യക്ഷ സ്ഥാനത്തേക്ക് കൊണ്ടുവരും എന്ന തരത്തിലുള്ള ചില റിപ്പോര്‍ട്ടുകള്‍ നേരത്തെ പുറത്ത് വന്നിരുന്നു. എന്നാല്‍, ഇക്കാര്യം സുരേഷ് ഗോപി നിഷേധിച്ചിരുന്നു. മാത്രമല്ല, പൊതുപ്രവര്‍ത്തനത്തില്‍ തല്‍പരനാണെങ്കിലും സിനിമ തന്നെയാണ് തന്‍െ്‌റ പ്രഥമ പരിഗണനയെന്ന് ഒന്നിലധികം തവണ അദ്ദേഹം വ്യക്തമാക്കിയിട്ടുമുണ്ട്. രാജ്യം മുഴുവന്‍ ശക്തി തെളിയിച്ചിട്ടും സംസ്ഥാനത്ത് മാത്രം പാര്‍ട്ടി പച്ചപിടിക്കാത്തതില്‍ ദേശീയ നേതൃത്വം കടുത്ത അതൃപ്തിയിലാണ്. സംസ്ഥാന നേതാക്കള്‍ക്കിടയിലെ ശീതസമരമാണ് പാര്‍ട്ടിയുടെ മുന്നേറ്റത്തിനു തടസമെന്ന വിലയിരുത്തലിലാണ് കേന്ദ്ര നേതൃത്വം.
പാര്‍ട്ടിയിലെ വിഭാഗീയത ഇപ്പോഴും തുടരുകയാണ്. ലോക്സഭാ തെരഞ്ഞടുപ്പിന് മുന്നോടിയായി സംസ്ഥാനത്തെ നേതൃത്വത്തില്‍ കാര്യമായ അഴിച്ചുപണി ഉണ്ടാകുമെന്നാണ് സൂചന. സുരേന്ദ്രന്റെ പ്രസിഡന്റ് കാലാവധി ജനുവരിയില്‍ അവസാനിക്കും. സംസ്ഥാനത്തിന്റെ ചുമതലയുള്ള പ്രകാശ് ജാവദേക്കര്‍ കഴിഞ്ഞ ദിവസം സുരേഷ് ഗോപി ഉള്‍പ്പടെയുള്ള നേതാക്കളുമായി കൂടിക്കാഴ്ച നടത്തിയിരുന്നു. അതിന് പിന്നാലെയാണ് സുരേഷ് ഗോപി കോര്‍ കമ്മറ്റിയില്‍ ഉള്‍പ്പെടുത്താനുള്ള തീരുമാനമുണ്ടായത്.
