കോട്ടയം: ഒരുമിച്ച് മദ്യപിച്ചശേഷം ഓട്ടോക്കൂലി ആവശ്യപ്പെട്ട ഡ്രൈവറെ ബിയര്‍കുപ്പിക്ക് തലയ്ക്കടിച്ചുകൊല്ലാന്‍ ശ്രമിച്ച കേസില്‍ യുവാവ് അറസ്റ്റില്‍. വൈക്കം ചെമ്പ് നൈനേത്ത് വീട്ടില്‍ ജിജോ (36) യെ ആണ് ജില്ലാ പോലീസ് മേധാവി കെ.കാര്‍ത്തിക്കിന്റെ നേതൃത്വത്തില്‍ വൈക്കം പോലീസ് അറസ്റ്റ് ചെയ്തത്.
എറണാകുളം ഇരുമ്പനം സ്വദേശിയായ ഓട്ടോ ഡ്രൈവറെയാണ് കൊലപ്പെടുത്താന്‍ ശ്രമിച്ചത്. എറണാകുളം വൈറ്റിലയില്‍നിന്ന് ഓട്ടോറിക്ഷയില്‍ വൈക്കത്തിന് വരുന്നതിനിടെ ഇരുവരും തൃപ്പൂണിത്തുറയില്‍ ബാറില്‍കയറി മദ്യപിച്ചു. തുടര്‍ന്ന് വൈക്കത്തുള്ള പ്രതിയുടെ വീട്ടില്‍ എത്തിയശേഷം ഡ്രൈവര്‍ ഓട്ടോക്കൂലി ആവശ്യപ്പെട്ടതോടെ ഇരുവരും തമ്മില്‍ വാക്കേറ്റമായി. ഇതോടെ ജിജോ ൈകയിലിരുന്ന ബിയര്‍ കുപ്പിക്ക് ഓട്ടോ ഡ്രൈവറെ തലയ്ക്കടിച്ചുവീഴ്ത്തുകയായിരുന്നു.
നൈറ്റ് പട്രോളിങ്ങിനിടെ വിവരമറിഞ്ഞ വൈക്കം പോലീസ് പ്രതിയെ പിടികൂടുകയായിരുന്നു. വൈക്കം പോലീസ് ഇന്‍സ്‌പെക്ടര്‍ കൃഷ്ണന്‍ പോറ്റി, എസ്.ഐ.മാരായ അജ്മല്‍ ഹുസൈന്‍, ഷാജി കുമാര്‍, പി.ജി.ഷാജി, എ.എസ്.ഐ. പ്രമോദ്, സി.പി.ഒ. മാരായ സാബു, ജാക്‌സണ്‍ എന്നിവരാണ് പോലീസ് സംഘത്തില്‍ ഉണ്ടായിരുന്നത്. വൈക്കം കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് റിമാന്‍ഡ്‌ െചയ്തു.
