മുല്ലപ്പെരിയാർ അണക്കെട്ടിലെ ജലനിരപ്പിൽ നേരിയ കുറവ്. 138.70 അടിയാണ് നിലവിലെ ജലനിരപ്പ്. അണക്കെട്ടിന്‍റെ വൃഷ്ടിപ്രദേശങ്ങളിൽ മഴ കുഞ്ഞതാണ് ജലനിരപ്പ് കുറയാൻ കാരണം. അണക്കെട്ടിലേക്കുള്ള നീരൊഴുക്കും കുറഞ്ഞിട്ടുണ്ട്.
ഇന്നലെ വൈകുന്നേരം അഞ്ചിന് ജലനിരപ്പ് 138.9 അടി പിന്നിട്ടിരുന്നു. കഴിഞ്ഞ ദിവസങ്ങളിൽ വനത്തിനുള്ളിൽ ശക്തമായ മഴയായിരുന്നു. ഇതു മൂലം അ ണക്കെട്ടിലേക്കുള്ള നീരൊഴുക്ക് ഏറെ വർധിച്ചിരിന്നു. ഡാമിലേക്കുള്ള നീരൊഴുക്ക് വർധിച്ചതോടെ സ്പിൽവേയുടെ എട്ടു ഷട്ടറുകൾ ഉയർത്തിയിരുന്നു. ആകെ 13 ഷട്ടറുകളാണ് സ്പിൽവേയ്ക്കുള്ളത്.
മുല്ലപ്പെരിയാർ ഡാമിലെ ഒന്നുമുതൽ എട്ടുവരെയുള്ള ഷട്ടറുകളാണ് 60 സെന്‍റിമീറ്റർ വീതം തുറന്നിരിക്കുന്നത്. സെക്കൻഡിൽ 3870 ഘനയടിയിലേറെ ജലം പെരിയാറിലേക്കൊഴുക്കുന്നുണ്ട്. 6175 ഘനയടി വെള്ളമാണ് ഡാമിലേക്ക് ഒഴുകിയെത്തുന്നത്. 2305 ഘനയടി വെള്ളമാണ് തമിഴ്നാട് കൊണ്ടുപോകുന്നത്.
