കാഴ്ചയില്ലയെന്ന് പറഞ്ഞ് പിന്നോട്ട് മാറ്റിയവരെല്ലാം ഇന്ന് ഗോകുലിന്റെ പിന്നിലാണ്. അന്ധതയെ ആത്മവിശ്വാസം കൊണ്ടും കഠിനപ്രയത്‌നം കൊണ്ടും മറി കടന്ന് ഗോകുല്‍ നേടിയെടുത്തത് സിവില്‍ സര്‍വ്വീസ് പരീക്ഷയിലെ 804-ാം റാങ്ക്. ഗോകുലിന്റെ വിജയം ഒരു രാത്രി ഇരുട്ടി വെളുത്തപ്പോള്‍ കിട്ടിയതല്ല. ഈ വിജയത്തിന് പറയാന്‍ വര്‍ഷങ്ങളുടെ കഷ്ടപ്പാടിന്റെയും കഠിനാധ്വാനത്തിന്റെയും കഥകളുണ്ട്. ചെറുപ്പം മുതല്‍ പഠനത്തില്‍ മികവ് പുലര്‍ത്തിയിരുന്ന ഗോകുലിന്റെ ജീവിതത്തിലെ ഏറ്റവും പ്രധാനപ്പെട്ട ലക്ഷ്യമായിരുന്നു സിവില്‍ സര്‍വ്വീസ്. വാശിയോടെ പഠിച്ച് ആ ചെറുപ്പക്കാരന്‍ അത് നേടുകയും ചെയ്തു. ആദ്യ ശ്രമത്തില്‍ തന്നെ സിവില്‍ സര്‍വ്വീസ് നേടാന്‍ സാധിച്ചത് ആ വിജയത്തിന് ഒരു പടി കൂടി തിളക്കം നല്‍കുന്നു. മാതാപിതാക്കളും, അധ്യാപകരും, സുഹൃത്തുക്കളും തന്റെ വിജയത്തിന് പിന്നിലെ നെടുംതൂണുകളാണെന്ന് ഗോകുല്‍ പറഞ്ഞു.
