വ്യാജ തെരഞ്ഞെടുപ്പ് ഐഡിക്കായി ‘കാര്ഡ് കളക്ഷന് ഗ്രൂപ്പ്’ എന്ന പേരില് വാട്സ്ആപ്പ് ഗ്രൂപ്പും; രാഹുല് മാങ്കൂട്ടത്തലിന്റെ സുഹൃത്തുക്കളും പ്രതികള്; ശനിയാഴ്ച ഹാജരാകാന് നോട്ടീസ് നല്കും
തിരുവനന്തപുരം: യൂത്ത് കോണ്ഗ്രസ് തെരഞ്ഞെടുപ്പിനുവേണ്ടി ഇലക്ഷന് കമ്മീഷന്റെ വ്യാജ ഐഡി കാര്ഡ് നിര്മിച്ചെന്ന കേസില് രാഹുല് മാങ്കൂട്ടത്തിലിന്റെ സുഹൃത്തുക്കളും പ്രതികള്. വ്യാജ കാര്ഡ് ഉണ്ടാക്കിയതില് സുഹൃത്തുക്കള്ക്കും പങ്കുണ്ടെന്നാണ് കണ്ടെത്തല്. ഇവരുടെ വീടുകളില് ക്രൈം ബ്രാഞ്ച് നേരത്തെ പരിശോധന നടത്തിയിരുന്നു. വ്യാജ കാര്ഡ് വിതരണത്തിനായി ‘കാര്ഡ് കലക്ഷന് ഗ്രൂപ്പ്’ എന്ന പേരിലാണ് പ്രതികള് വാട്സാപ്പ് ഗ്രൂപ്പുണ്ടാക്കിയത്.
വ്യാജ തിരിച്ചറിയല് കാര്ഡ് കേസില് രാഹുല് മാങ്കൂട്ടത്തില് എംഎല്എയെ വീണ്ടും ചോദ്യം ചെയ്യാനും ക്രൈം ബ്രാഞ്ച് തീരുമാനിച്ചു. ശനിയാഴ്ച ഹാജരാകാന് ആവശ്യപ്പെട്ട് നോട്ടീസ് നല്കും. നേരത്തെ നോട്ടിസ് നല്കിയെങ്കിലും രാഹുല് സാവകാശം തേടിയിരുന്നു. യൂത്ത് കോണ്ഗ്രസ് തിരഞ്ഞെടുപ്പില് വ്യാജ തിരിച്ചറിയല് കാര്ഡ് നിര്മിച്ച കേസിലെ പ്രതികളുടെ ഫോണില് നിന്ന് ലഭിച്ച ശബ്ദരേഖയില് രാഹുലിന്റെ പേര് പരാമര്ശിച്ചതോടെയാണ് വീണ്ടും ചോദ്യം ചെയ്യാന് ക്രൈംബ്രാഞ്ച് തീരുമാനിച്ചിരുന്നത്.
രാഹുലിന്റെ അടുത്ത സുഹൃത്തുക്കളായ നാലുപേരുടെ വീട്ടില് ക്രൈം ബ്രാഞ്ച് പരിശോധന നടത്തുകയും മൊബൈല് ഫോണുകള് പിടിച്ചെടുക്കുകയും ചെയ്തിരുന്നു. വ്യാജ തിരിച്ചറിയല് രേഖ കേസില് പൊലീസിന്റെ ആദ്യത്തെ ചോദ്യം ചെയ്യലില് രാഹുല് മാങ്കൂട്ടത്തില് ആരോപണങ്ങള് നിഷേധിച്ചിരുന്നു. കേസില് അറസ്റ്റിലായ പ്രതികളുമായി ബന്ധമുണ്ടെങ്കിലും അവര് വ്യാജ രേഖയുണ്ടാക്കിയതായി അറിയില്ലെന്നും, അത്തരത്തില് വോട്ടുകള് ലഭിച്ചിട്ടില്ലെന്നുമായിരുന്നു രാഹുലിന്റെ മൊഴി.
അതേസമയം, യൂത്ത് കോണ്ഗ്രസ് സംഘടനാ തെരഞ്ഞെടുപ്പില് വ്യാപകമായി വ്യാജ തിരിച്ചറിയല് കാര്ഡുകള് ഉപയോഗിച്ചുവെന്ന് തിരഞ്ഞെടുപ്പ് കമ്മീഷന് പൊലീസ് റിപ്പോര്ട്ട് നല്കിയിരുന്നു.
rahul-mamkootathil-fake-id-case
