വരാനുള്ള ഭാഗ്യം വഴിയിൽത്തങ്ങില്ല, സുഹൃത്തുക്കളുടെ നിര്‍ബന്ധത്തിന് വഴങ്ങി എടുത്ത ലോട്ടറിക്ക് അടിച്ചത് കോടികൾ
വാഷിംഗ്ടണ്‍: ലോട്ടറി എടുക്കാന്‍ താല്‍പര്യമില്ലാത്ത യുവതി സുഹൃത്തുക്കളുടെ നിർബന്ധത്തിന് വഴങ്ങി ഭാഗ്യം പരീക്ഷിച്ചു , അടിച്ചത് കോടികൾ ! അമേരിക്കയിലെ ലൂയിസ് വില്ലെ സ്വദേശിനി ലോറി ജെയിന്‍സിനാണ് തുക സമ്മാനമായി അടിച്ചിരിക്കുന്നത്. ഇവര്‍ സ്‌ക്രാച്ച് കാര്‍ഡ് ലോട്ടറിയാണ് എടുത്തത്. ജോലി ചെയ്യുന്ന സ്ഥാപനത്തിന്റെ ഹോളിഡേ പാര്‍ട്ടിക്കായി വരികയും, അതില്‍ പങ്കെടുത്ത് കൊണ്ടിരിക്കുകയും ചെയ്യുന്ന സമയത്താണ് ഈ യുവതിയെ തേടി ഭാഗ്യമെത്തിയത്. കെന്റക്കി ലോട്ടറിയാണ് ഇവര്‍ എടുത്തത്.
“സുഹൃത്തുക്കളെല്ലാം എന്നെ ലോട്ടറിയെടുക്കാന്‍ നിര്‍ബന്ധിച്ചിരുന്നു. പാര്‍ട്ടിയിലെ ആവേശത്തിലാണ് ടിക്കറ്റെടുത്ത് പോയത്. ആദ്യത്തെ സ്‌ക്രാച്ച് കാര്‍ഡില്‍ 50 ഡോളറാണ് എനിക്ക് സമ്മാനമായി അടിച്ചത്. ആ പണം ഉപയോഗിച്ചാണ് രണ്ടാമത്തെ ടിക്കറ്റ് എടുത്തത്. എന്നാല്‍ പിന്നീട് കിട്ടിയ ജാക്ക്‌പോട്ട് ടിക്കറ്റായിരുന്നു. അടിച്ച തുക കേട്ടാല്‍ ആരും ഞെട്ടിപ്പോകും. ഒന്നര കോടി രൂപയാണ് ജാക്‌പോട്ടിലൂടെ ലഭിച്ചിരിക്കുന്നത് “- യുവതി പറഞ്ഞു. എല്ലാവര്‍ക്കും ഞെട്ടലായിരുന്നു തനിക്ക് ലോട്ടറി അടിച്ചെന്ന് അറിഞ്ഞപ്പോഴെന്ന് ലോറി പറയുന്നു. മകളുടെ പഠനത്തിനായി എടുത്ത വായ്പ അടച്ചുതീര്‍ക്കാന്‍ ഈ പണം ഉപയോഗിക്കുമെന്ന് ലോറി പറഞ്ഞു.
