മാവേലിക്കര: നഗരത്തിലെ ലോഡ്ജില്‍ താമസിക്കുന്ന അംഗപരിമിതന്റെ മൊബൈല്‍ ഫോണും പണവും അപഹരിച്ച കേസില്‍ 2 പേര്‍ അറസ്റ്റില്‍. മാവേലിക്കര പുതിയകാവ് കുളത്തിന്റെ കരയില്‍ രാജേന്ദ്രപ്രസാദ് (ബാബുക്കുട്ടന്‍-57), പത്തിയൂര്‍ എരുവ പുത്തന്‍കണ്ടത്തില്‍ വിഷ്ണു (പുല്‍ച്ചാടി- 30) എന്നിവരെയാണു അറസ്റ്റ് ചെയ്തത്. കഴിഞ്ഞദിവസം രാവിലെ ഏഴോടെ നഗരസഭ സ്വകാര്യ ബസ് സ്റ്റാന്‍ഡിനു സമീപമുള്ള ലോഡ്ജ് മുറിയില്‍ അതിക്രമിച്ചു കടന്ന ഇരുവരും അംഗപരിമിതനായ യുവാവിന്റെ കൈവശം ഉണ്ടായിരുന്ന ബാഗ് തട്ടിപ്പറിച്ചു 19,000 രൂപയും മൊബൈല്‍ ഫോണും അപഹരിച്ചു.
നഗരത്തിലെ ബാറിനു സമീപത്തു നിന്നു കഴിഞ്ഞദിവസം രാത്രിയിലാണു അറസ്റ്റ് ചെയ്തത്. 2014 മുതല്‍ കവര്‍ച്ച, മോഷണം, കഞ്ചാവ് കടത്ത് തുടങ്ങിയ കേസുകളില്‍ ഇരുവരും പ്രതികളാണെന്നു പോലീസ് പറഞ്ഞു.
