വയനാട് കൽപ്പറ്റ പുഴമുടിയിൽ നിയന്ത്രണം വിട്ട കാർ അപകടത്തിൽ പെട്ട് മരിച്ച മൂന്ന് പേരെയും തിരിച്ചറിഞ്ഞു.ഇരിട്ടി ഡോൺ ബോസ്കോ കോളജിൽ നിന്ന് എം ബി എ കഴിഞ്ഞ വിദ്യാർത്ഥികൾ സഞ്ചരിച്ചിരുന്ന കാറാണ് അപകടത്തിൽപ്പെട്ടത്.
ഇരിട്ടി അങ്ങാടിക്കടവ് കാലക്കൽ ജിഷ്ണ മേരി ജോസഫ്, കാസർകോട് വെള്ളരിക്കുണ്ട് പുത്തൻ പുരക്കൽ സ്നേഹ ജോസഫ്, ഇരിട്ടി അങ്ങാടിക്കടവ് ചെന്നെളിൽ അഡോൺ ബെസ്റ്റി എന്നിവരാണ് മരിച്ചത്. ഗുരുതര പരുക്കേറ്റ ഡീയോണ എന്ന പെൺകുട്ടിയെ മേപ്പാടിയിലെ സ്വകാര്യ മെഡിക്കൽ കോളജ് ആശുപത്രിയിലെ വെന്റിലേറ്ററിലാക്കി. ഇവർ മരിച്ച അഡോൺ ബെസ്റ്റിയുടെ സഹോദരിയാണ്.
പരുക്കേറ്റ മറ്റ് രണ്ട് പേർ കൽപ്പറ്റയിലെ സ്വകാര്യ ആശുപത്രിയിലാണ് ഉള്ളത്.പൂളക്കുറ്റി വെള്ളക്കണ്ടിയിൽ സാൻജിയോ ജോസ്, മരിച്ച സ്നേഹയുടെ സഹോദരി വെള്ളരിക്കുണ്ട് മങ്കയം പുത്തൻപുരക്കൽ സോണ എന്നിവരാണ് കൽപ്പറ്റയിൽ ചികിത്സയിലുള്ളത്.
കല്‍പ്പറ്റ-പടിഞ്ഞാറത്തറ റോഡിന് സമീപത്തു വച്ചാണ് അപകടമുണ്ടായത്.റോഡ് സൈഡിലെ വൈദ്യുത പോസ്റ്റില്‍ ഇടിച്ച്‌ നിയന്ത്രണം വിട്ട കാര്‍ താഴ്ചയിലേക്ക് മറിയുകയായിരുന്നു.വൈകുന്നേരം ആറോടെയാണ് അപകടം.മരിച്ചവരുടെ മൃതദേഹങ്ങൾ കൽപ്പറ്റയിലെ സ്വകാര്യ ആശുപത്രി മോർച്ചറിയിൽ.
