കുവൈത്ത് സിറ്റി: പെരുന്നാളിനു മുൻപ് നാട്ടിലെത്താന്‍ ടിക്കറ്റെടുത്തവര്‍ക്ക് എയര്‍ഇന്ത്യ എക്സ്പ്രസിന്റെ ഇരുട്ടടി.വ്യാഴാഴ്ച രാത്രി 11.30ന് കുവൈത്തില്‍നിന്ന് കണ്ണൂരിലേക്കുള്ള എയര്‍ ഇന്ത്യ എക്സ്പ്രസാണ് റദ്ദാക്കിയത്.
വ്യാഴാഴ്ച രാത്രി കുവൈത്തില്‍നിന്ന് പുറപ്പെട്ട് വെള്ളിയാഴ്ച രാവിലെ ഇന്ത്യന്‍ സമയം 6.30ന് കണ്ണൂരിലെത്തുന്ന വിമാനമാണിത്. പെരുന്നാള്‍ ആഘോഷത്തിനായി കുടുംബത്തോടൊപ്പം ചേരാന്‍ കുവൈത്തില്‍നിന്ന് നിരവധി പേരാണ് ഈ വിമാനത്തില്‍ ടിക്കറ്റെടുത്തിരുന്നത്. വ്യാഴാഴ്ച ജോലിയും നോമ്ബുതുറയും കഴിഞ്ഞ് യാത്ര തുടങ്ങിയാല്‍ അതിരാവിലെ നാട്ടിലെത്താം എന്നത് കണക്കിലെടുത്താണ് പലരും ടിക്കറ്റെടുത്തത്. എന്നാല്‍, വിമാനം റദ്ദാക്കിയതോടെ എല്ലാം താളംതെറ്റുകയായിരുന്നു.
അതേസമയം റദ്ദാക്കിയ എയര്‍ ഇന്ത്യ വിമാനം ഇന്ന് രാവിലെ അഞ്ചിനു പുറപ്പെട്ടിട്ടുണ്ട് വിമാനത്തിന്റെ സാങ്കേതിക തകരാറാണ് യാത്രാതടസ്സത്തിന് കാരണമായി അധികൃതർ പറയുന്നത്.യാത്ര മുടങ്ങിയവര്‍ക്ക് ടിക്കറ്റുകള്‍ റദ്ദാക്കാനും മറ്റൊരു ദിവസത്തേക്ക് മാറ്റാനും അവസരം നല്‍കിയിട്ടുണ്ട്.
