Tag Archives: Death

മരണത്തിന് ദിവസങ്ങൾക്ക് മുമ്പ് മൈക്കൽ ജാക്സൻ സുഹൃത്തിനോട് വധഭീഷണിയുണ്ടെന്ന് പറഞ്ഞു,കൊല്ലപ്പെടാനുളള സാധ്യത പറഞ്ഞ് പോപ്പ് സ്റ്റാർ എ‍ഴുതിയ കത്തും പുറത്ത്

വിഖ്യാത ഗായകൻ മൈക്കൽ ജാക്സന്‍റെ മരണകാരണത്തിൽ ദുരൂഹതയേറുന്നു.കൊല്ലപ്പെടാനുളള സാധ്യത ചൂണ്ടിക്കാട്ടി മരണത്തിന് ദിവസങ്ങൾക്ക് മുമ്പ് ജാക്സൻ അയച്ച കത്ത് പുറത്ത്.ജാക്സന്‍റെ ഉറ്റ സുഹൃത്തും ജർമൻ ബിസിനസുകാരനുമായ മൈക്കൽ ജേക്കബ് ഷാഗെൻ ആണ് വെളിപ്പെടുത്തലുമായി രംഗത്തെത്തിയത്.ഒരു ടിവി ഷോയിലാണ് മൈക്കൽ ജേക്കബ് ഷാഗെൻ വെളിപ്പെടുത്തൽ നടത്തിയത്.

 

തനിക്കയച്ച കത്തിൽ അവരെന്നെ കൊല്ലുമെന്ന് ജാക്സൻ പറയുന്നതായി മൈക്കൽ ജേക്കബ് ഷാഗെൻ ചൂണ്ടിക്കാട്ടുന്നു.ലാസ് വേഗാസിൽ നിന്ന് ജാക്സൻ തന്നെ വിളിച്ചുവെന്നും ജർമ്മനിയിലുളള തന്നോട് എത്രയും പെട്ടെന്ന് അമേരിക്കയിലേക്ക് വരാൻ അഭ്യർത്ഥിച്ചുവെന്നും മൈക്കൽ ജേക്കബ് ഷാഗെൻ വ്യക്തമാക്കി.

 

ലണ്ടനിൽ കൺസേർട്ടുകൾ സംഘടിപ്പിക്കുന്ന എഇജി എന്ന കമ്പനിയെ കുറിച്ച് ജാക്സൻ പരാമർശിച്ചിരുന്നതായി മൈക്കൽ ജേക്കബ് ഷാഗെൻ പറയുന്നു.എഇജി വല്ലാതെ സമ്മർദ്ധം തരുന്നുണ്ടെന്നും ജാക്സൻ അറിയിച്ചിരുന്നു.തന്‍റെ ജീവിതത്തെ കുറിച്ച് ജാക്സന് വലിയ ഉത്കണ്ഠ ഉണ്ടായിരുന്നുവെന്നും മൈക്കൽ ജേക്കബ് ഷാഗെൻ വെളിപ്പെടുത്തി.ഇക്കാര്യങ്ങൾ പറഞ്ഞ് ദിവസങ്ങൾക്കകം ആയിരുന്നു ജാക്സൻ ദുരൂഹ സാഹചര്യത്തിൽ മരിച്ചത്.സെഡേറ്റീവ് പ്രോപോഫോൾ അമിതയായി ക‍ഴിച്ചതാണ് മരണത്തിന് കാരണമെന്നാണ് ഔദ്യോഗിക കണ്ടെത്തൽ.