KeralaNEWS

അധ്യാപകരുടെ അശ്രദ്ധ; എസ്എസ്എല്‍സിയ്ക്ക് ഒരു വിഷയത്തിന് ആബ്‌സന്റ്, വിദ്യാര്‍ത്ഥിയുടെ തുടര്‍പഠനം ആശങ്കയില്‍

പരീക്ഷ ജോലിക്കെത്തിയ അധ്യാപകരുടെ അശ്രദ്ധ മൂലം വിദ്യാര്‍ത്ഥിക്ക് എസ്എസ്എല്‍സിയ്ക്ക് ഒരു വിഷയത്തിന് ഹാജരില്ലെന്ന് രേഖപ്പെടുത്തി.മേപ്പയൂര്‍ ഗവ. വൊക്കേഷനല്‍ ഹയര്‍ സെക്കന്‍ഡറി സ്‌കൂളിലെ വിദ്യാര്‍ത്ഥി മുഹമ്മദ് യാസിനാണ് എഴുതിയ ഇംഗ്ലീഷ് പരീക്ഷയ്ക്ക് ഫലം വന്നപ്പോള്‍ ‘ആബ്‌സന്റ്’ അടയാളപ്പെടുത്തിയിരിക്കുന്നത്.

മാര്‍ച്ച് 21ന് നടന്ന ഇംഗ്ലീഷ് പരീക്ഷയ്ക്ക് യാസിന്‍ എത്തിയിട്ടില്ലെന്ന് അധ്യാപകര്‍ രക്ഷിതാവിനെ അറിയിക്കുകയായിരുന്നു. രക്ഷിതാവ് സ്‌കൂളിലെത്തി പരീക്ഷ എഴുതുന്ന ക്ലാസും രജിസ്റ്റര്‍ നമ്പറും കുട്ടിയുടെ ഫോട്ടോയും കാണിച്ചു. എന്നിട്ടും അധ്യാപകര്‍ കുട്ടി എത്തിയിട്ടില്ല എന്ന മറുപടിയാണ് നല്‍കിയത്.

പൊതുപരീക്ഷ ആയതിനാല്‍ മറ്റൊരു സ്‌കൂളിലെ അധ്യാപകരാണ് പരീക്ഷാ ജോലിക്ക് നിയോഗിക്കപ്പെട്ടിരുന്നത്. അതുകൊണ്ടു വിദ്യാര്‍ഥിയെ പരിചയമുള്ള അധ്യാപകര്‍ സ്‌കൂളിലുണ്ടായിരുന്നില്ല. തുടര്‍ന്ന് അധ്യാപകരുടെ നിര്‍ദേശപ്രകാരം രക്ഷിതാവ് മേപ്പയൂര്‍ പൊലീസില്‍ പരാതി നല്‍കി. പരീക്ഷ കഴിഞ്ഞ ശേഷം അന്വേഷിക്കാമെന്ന് പൊലീസ് പറഞ്ഞു. സ്‌കൂളില്‍ കോവിഡ് നിയന്ത്രണ ജോലിക്ക് നിയോഗിക്കപ്പെട്ട പൊലീസ് ഉദ്യോഗസ്ഥര്‍ക്ക് ഇതിനിടെ മേപ്പയ്യൂര്‍ പൊലീസ് അറിയിപ്പു നല്‍കിയിരുന്നു.

തുടര്‍ന്ന് രക്ഷിതാവ് സ്‌കൂളില്‍ പൊലീസിനൊപ്പം പരീക്ഷ കഴിയുന്നതുവരെ കാത്തിരുന്നു. പരീക്ഷ കഴിഞ്ഞ് സ്‌കൂളിനു പുറത്തേക്ക് മൂന്നാമതായി കുട്ടി ഇറങ്ങിവന്നു. ആ സമയം പരീക്ഷാഫലം വരുമ്പോള്‍ പ്രശ്‌നമാവുമോ എന്ന് രക്ഷിതാവ് ചോദിച്ചെങ്കിലും പ്രശ്‌നം പരിഹരിക്കാമെന്ന് അധ്യാപകര്‍ ഉറപ്പുനല്‍കിയിരുന്നു. എന്നാല്‍ ഫലം വന്നപ്പോള്‍ പരീക്ഷക്ക് കുട്ടി ഹാജരായില്ല എന്നാണ് രേഖപ്പെടുത്തിയത്. ഈ പ്രശ്‌നം എങ്ങനെ പരിഹരിക്കുമെന്നറിയാതെ യാസിന്റെ അധ്യാപകര്‍ ആശങ്കയിലാണ്. തന്റെ ഉത്തരക്കടലാസ് കണ്ടെത്തണമെന്നും പ്രശ്‌നം പരിഹരിക്കണമെന്നുമാവശ്യപ്പെട്ട് യാസീന്‍ പൊതുവിദ്യാഭ്യാസ വകുപ്പ് ഡയറക്ടര്‍ക്കും മന്ത്രിക്കും പരാതി നല്‍കി. പേരാമ്പ്രയിലെ ഹോട്ടല്‍ തൊഴിലാളി വാല്യക്കോട് കരിങ്ങാറ്റിക്കല്‍ മീത്തല്‍ റാസിഖ് പരീദിന്റെ മകനാണ് മുഹമ്മദ് യാസിന്‍.

NewsThen More

Leave a Reply

Your email address will not be published. Required fields are marked *

Back to top button

Adblock Detected

Please consider supporting us by disabling your ad blocker