യുറേനിയം ശേഖരം ഉപേക്ഷിക്കാന് ഇറാന് തയാര്; ട്രംപ് പ്രഖ്യാപിച്ച സമാധാന കരാറില് നിര്ണായക വഴിത്തിരിവെന്ന് യു.എസ് ഉദ്യോഗസ്ഥര്; ട്രംപിന്റെ ഭീഷണിക്കു വഴങ്ങി; ഹോര്മൂസ് കടലിടുക്കും തുറക്കും; കരാര് പ്രഖ്യാപനം ഉടനെന്നു വിവരം
വാഷിംഗ്ടണ്: പശ്ചിമേഷ്യയിലെ യുദ്ധം അവസാനിപ്പിക്കുന്നതിനായി അമേരിക്കന് പ്രസിഡന്റ് ഡൊണാള്ഡ് ട്രംപ് പ്രഖ്യാപിച്ച സമാധാന കരാറില് ചരിത്രപരമായ വഴിത്തിരിവ്. ഇറാന്റെ പക്കലുള്ള അതിതീവ്രമായി സമ്പുഷ്ടീകരിച്ച യുറേനിയം ശേഖരം പൂര്ണ്ണമായും ഉപേക്ഷിക്കാന് ടെഹ്റാന് തത്വത്തില് സമ്മതിച്ചതായി മുതിര്ന്ന യു.എസ് ഉദ്യോഗസ്ഥരെ ഉദ്ധരിച്ച് ‘ദി ന്യൂയോര്ക്ക് ടൈംസ്’ റിപ്പോര്ട്ട് ചെയ്തു. മാസങ്ങളായി തുടരുന്ന യു.എസ്-ഇസ്രായേല് സംയുക്ത സൈനിക നീക്കങ്ങള്ക്കും നയതന്ത്ര പ്രതിസന്ധികള്ക്കും ഇതോടെ താല്ക്കാലിക ശമനമാകുമെന്നാണ് വിലയിരുത്തല്.
സമാധാനത്തിനായുള്ള പ്രാഥമിക ധാരണാപത്രത്തില് (എംഒയു) യുറേനിയം ഉപേക്ഷിക്കാമെന്ന പൊതുവായ ഉറപ്പ് ഇറാന് നല്കിയിട്ടുണ്ട്. എന്നാല് ഈ ആണവ ശേഖരം എങ്ങനെ, ഏത് രാജ്യത്തിന് കൈമാറും എന്നതുപോലുള്ള കൃത്യമായ വിശദാംശങ്ങള് കരാര് ഒപ്പുവെച്ചതിന് ശേഷം വരും ദിവസങ്ങളില് നടക്കുന്ന 30 മുതല് 60 ദിവസത്തെ വിപുലമായ ആണവ ചര്ച്ചകളില് തീരുമാനിക്കും.
യു.എസിന്റെ സൈനിക ഭീഷണിക്ക് വഴങ്ങി ഇറാന്
ആദ്യ ഘട്ടത്തില് ആണവ സംബന്ധമായ ചര്ച്ചകള് സമാധാന കരാറില് നിന്ന് ഒഴിവാക്കാനാണ് ഇറാന് ശ്രമിച്ചത്. എന്നാല് യുറേനിയം ശേഖരത്തിന്റെ കാര്യത്തില് കൃത്യമായ ഉറപ്പ് ലഭിച്ചില്ലെങ്കില് സമാധാന ചര്ച്ചകളില് നിന്ന് പിന്മാറുമെന്നും, ഇറാനെതിരെ ശക്തമായ സൈനിക നടപടി പുനരാരംഭിക്കുമെന്നും അമേരിക്ക മധ്യസ്ഥര് വഴി കടുത്ത മുന്നറിയിപ്പ് നല്കി. ഇറാന്റെ ഇസ്ഫഹാനിലെ ഭൂഗര്ഭ ആണവനിലയങ്ങള് തകര്ക്കാന് ബങ്കര് ബസ്റ്റര് ബോംബുകള് ഉപയോഗിച്ചുള്ള ആക്രമണങ്ങളും യു.എസ്-ഇസ്രായേല് കമാന്ഡോ റെയ്ഡുകളും അടക്കമുള്ള പദ്ധതികള് അമേരിക്കന് സൈന്യം ട്രംപിന് മുന്നില് സമര്പ്പിച്ചിരുന്നു. ഈ കടുത്ത സൈനിക സമ്മര്ദ്ദത്തിനൊടുവിലാണ് ഇറാന് തങ്ങളുടെ ആണവ നിലപാടില് വിട്ടുവീഴ്ചയ്ക്ക് തയ്യാറായത്.
നിലവില് അന്താരാഷ്ട്ര ആണവോര്ജ്ജ ഏജന്സിയുടെ കണക്കനുസരിച്ച് 60 ശതമാനം വരെ സമ്പുഷ്ടീകരിച്ച 970 പൗണ്ടോളം (440 കിലോഗ്രാം) യുറേനിയം ഇറാന്റെ പക്കലുണ്ട്. ഇത് കൂടുതല് സമ്പുഷ്ടീകരിച്ചാല് ഒന്നിലധികം ആണവ ബോംബുകള് നിര്മ്മിക്കാന് സാധിക്കുമെന്ന് ഇസ്രായേല് മുന്നറിയിപ്പ് നല്കിയിരുന്നു. ഈ ശേഖരം ഒന്നുകില് റഷ്യ പോലുള്ള മൂന്നാം രാജ്യത്തിന് കൈമാറാനോ അല്ലെങ്കില് ആയുധമുണ്ടാക്കാന് കഴിയാത്ത വിധം അതിന്റെ തീവ്രത കുറയ്ക്കാനോ ആണ് ആലോചന.
ഹോര്മുസ് കടലിടുക്ക് തുറക്കും
കരാര് പൂര്ണ്ണമാകുന്നതോടെ ലോകത്തെ പ്രധാന എണ്ണക്കപ്പല് പാതയായ ഹോര്മുസ് കടലിടുക്ക് ഇറാന് ഘട്ടഘട്ടമായി തുറന്നുനല്കും. കപ്പലുകളുടെ സുഗമമായ യാത്രയ്ക്കായി കടലിടുക്കില് സ്ഥാപിച്ച മൈനുകള് ഇറാന് നീക്കം ചെയ്യും. പകരമായി ഇറാന്റെ തുറമുഖങ്ങള്ക്ക് മേല് അമേരിക്ക ഏര്പ്പെടുത്തിയ നാവിക ഉപരോധം പിന്വലിക്കുകയും ചെയ്യും. കൂടാതെ അന്താരാഷ്ട്ര തലത്തില് മരവിപ്പിക്കപ്പെട്ട ഇറാന്റെ 25 ബില്യണ് ഡോളറിന്റെ വിദേശ ആസ്തികള് അവര്ക്ക് തിരികെ ലഭിക്കുമെന്നും റിപ്പോര്ട്ടില് പറയുന്നു.
കരാര് ഏതാണ്ട് പൂര്ത്തിയായതായി ട്രംപ് തന്റെ ‘ട്രൂത്ത് സോഷ്യല്’ പ്ലാറ്റ്ഫോമിലൂടെ സ്ഥിരീകരിച്ചു. പാകിസ്താന് സൈനിക മേധാവി ഫീല്ഡ് മാര്ഷല് അസിം മുനീര് അടക്കമുള്ള മധ്യസ്ഥരുമായും സൗദി അറേബ്യ, യു.എ.ഇ, ഖത്തര് തുടങ്ങിയ ഗള്ഫ് രാജ്യങ്ങളിലെ നേതാക്കളുമായും ഇസ്രായേല് പ്രധാനമന്ത്രി ബെന്യാമിന് നെതന്യാഹുവുമായും ട്രംപ് ചര്ച്ചകള് നടത്തിക്കഴിഞ്ഞു. ഇറാന്റെ വിദേശകാര്യ മന്ത്രാലയവും ചര്ച്ചകള് അവസാന ഘട്ടത്തിലാണെന്ന് സൂചിപ്പിച്ചിട്ടുണ്ട്.
#IranUraniumDeal, #DonaldTrump, #USIranRelations, #NuclearDeal, #USOfficials, #BreakingNews, #InternationalPolitics, #WhiteHouseUpdates, #NewYorkTimes, #GlobalNews, #ForeignPolicy, #UraniumEnrichment, #MiddleEastPolitics, #DailyhuntTrending, #GoogleNews, #WorldPolitics, #ഇറാൻയുറേനിയംകരാർ, #ഡൊണാൾഡ്ട്രംപ്, #അന്താരാഷ്ട്രവാർത്തകൾ, #അമേരിക്കഇറാൻ
