കഴിഞ്ഞ 15 വർഷമായി തമിഴ് സംവിധായകൻ വെട്രിമാരൻ മനസിൽ കൊണ്ടുനടന്ന സ്വപ്‍ന പ്രോജക്റ്റ് ആയിരുന്നു വിടുതലൈ. 4 കോടി ബജറ്റിലാണ് ചെയ്യാൻ ആദ്യം ആലോചിച്ചതെങ്കിലും പിന്നീട് 40 കോടി മുതൽമുടക്കിൽ ചെയ്യാൻ സാധിക്കുന്ന നിർമ്മാതാവിനെ അദ്ദേഹത്തിന് ലഭിക്കുകയായിരുന്നു. ചിത്രത്തിലെ റെയിൽ പാളം സ്ഫോടകവസ്തു വച്ച് തകർക്കുന്ന ഒരു നിർണ്ണായക സീക്വൻസിൻറെ ബജറ്റ് മാത്രം 8 കോടി ആണെന്നാണ് റിപ്പോർട്ടുകൾ. ഇപ്പോഴിതാ ഈ രംഗത്തിൻറെ മേക്കിംഗ് വീഡിയോ പുറത്തുവിട്ടിരിക്കുകയാണ് അണിയറക്കാർ.
കലാസംവിധായകൻ എത്ര മികവോടെയാണ് ഈ സീക്വൻസിന് വേണ്ട പിന്തുണ നൽകിയതെന്ന് ഈ മേക്കിംഗ് വീഡിയോയിലൂടെ മനസിലാവും. ജാക്കിയാണ് ചിത്രത്തിൻറെ കലാസംവിധാനം നിർവ്വഹിച്ചിരിക്കുന്നത്. ക്രൈം ത്രില്ലർ വിഭാഗത്തിൽ പെടുന്ന ചിത്രമാണിത്. ബി ജയമോഹൻറെ തുണൈവൻ എന്ന ചെറുകഥയെ ആസ്പദമാക്കി വെട്രിമാരൻ തന്നെയാണ് തിരക്കഥയൊരുക്കിയിരിക്കുന്നത്. സൂരി നായകനാവുന്ന ചിത്രത്തിൽ മറ്റൊരു പ്രധാന കഥാപാത്രത്തെ അവതരിപ്പിക്കുന്നത് വിജയ് സേതുപതിയാണ്. വിജയ് സേതുപതി വേറിട്ട ഗെറ്റപ്പിലാണ് ചിത്രത്തിൽ എത്തുന്നത്. ആർ എസ് ഇർഫോടെയ്ൻ‍മെൻറിൻറെ ബാനറിൽ എൽറെഡ് കുമാറാണ് നിർമ്മാണം. റെഡ് ജയൻറ് മൂവീസ് ആണ് വിതരണം.
ഗൌതം വസുദേവ് മേനോൻ, ഭവാനി ശ്രീ, പ്രകാശ് രാജ്, രാജീവ് മേനോൻ, ചേതൻ തുടങ്ങിയവർ മറ്റു കഥാപാത്രങ്ങളെ അവതരിപ്പിക്കുന്നു. ആർ വേൽരാജ് ആണ് ഛായാഗ്രഹണം. സംഗീതം ഇളയരാജ, എഡിറ്റിംഗ് ആർ രാമർ, സംഘട്ടനം പീറ്റർ ഹെയ്‍ൻ, സ്റ്റണ്ട് സിവ, വരികൾ സുക, യുഗ ഭാരതി. രണ്ട് ഭാഗങ്ങളായി പ്ലാൻ ചെയ്തിരിക്കുന്ന ചിത്രത്തിൻറെ ആദ്യ ഭാഗമാണ് മാർച്ച് 31 ന് തിയറ്ററുകളിൽ എത്തിയിരിക്കുന്നത്. ചിത്രത്തിന് മികച്ച പ്രേക്ഷക പ്രതികരണമാണ് ലഭിക്കുന്നത്.
