കൊറോണക്ക് ശേഷം റഹ്മാൻ്റെ പ്രദർശനത്തിനെത്തിയ സിനിമ തെലുങ്കിലെ സീട്ടിമാർ മാത്രമാണ്. എന്നാൽ ലോക്ക്ഡൗണിന് ശേഷം അര ഡസനോളം ചിത്രങ്ങളിൽ അഭിനയിച്ച് കൊണ്ടിരിക്കയാണ് താരം. ഓരോ ചിത്രങ്ങളിലേയും കഥാപാത്രങ്ങൾക്കായി ശരീരത്തിൻ്റെ തടി കൂട്ടിയും കുറച്ചും ഗൃഹപാഠങ്ങൾ നടത്തിയും അഭിനയിച്ച് കൊണ്ട് സെക്കൻ്റ് ഇന്നിങ്സിന് തയ്യാറെടുക്കുകയാണ് റഹ്മാൻ.
ലോക്ക്ഡൗണിന് ശേഷം ആദ്യം അഭിനയിച്ചത് മണിരത്നത്തിൻ്റെ ഡ്രീം പ്രോജക്ടായ പൊന്നിയിൻ സെൽവനിലെ മർമ്മ പ്രധാനമായ കഥാപാത്രമായി. ഇതിനു വേണ്ടി വാൾപയറ്റ്, കുതിരയോട്ടം എന്നിവ അഭ്യസിച്ചതോടൊപ്പം കഥാപാത്രത്തിൻ്റെ ആവശ്യകതക്ക് അനുസൃതമായി ശരീരം ആദ്യം കുറച്ചും പിന്നീട് കൂട്ടുകയും ചെയ്തു. അതിന് ശേഷം എത്തിയത് മലയാളത്തിൽ ‘ എതിരെ ‘ എന്ന സിനിമയിൽ ഡിവൈഎസ്പി അസാർ മുഹമ്മദ് എന്ന നായക കഥാപാത്രത്തെ അവതരിപ്പിക്കാൻ വേണ്ടി. ഈ സിനിമയിലെ കഥാപാത്രത്തിന് സ്ക്രീനിൽ കാഴ്ചക്ക് ഗാംഭീര്യം വേണമെന്നത് കൊണ്ട് ശരീരം കൂട്ടുകയായിരുന്നു.
‘എതിരെ’ ക്ക് ശേഷം അഞ്ചു മാസക്കാലം ഹിന്ദിയിലെ മുൻനിര സംവിധായകരിൽ പ്രശസ്തനായ വികാസ് ഭാൽ അണിയിച്ചൊരുക്കുന്ന മെഗാ ചിത്രമായ ഗൺപതിലായിരുന്നു അഭിനയിച്ചത്. ടൈഗർ ഷ്റോഫും, റഹ്മാനുമാണ് മുഖ്യ വേഷത്തിൽ. ഇതിൽ റഹ്മാൻ്റെ പിതാവായി അമിതാഭ് ബച്ചൻ അഭിനയിക്കുന്ന വാർത്ത നേരത്തേ വന്നിരുന്നു. ഇതിൽ രണ്ടു വ്യത്യസ്ത രൂപ ഭാഗങ്ങളിലാണ് റഹ്മാൻ അഭിനയിക്കുന്നത്. കഴിഞ്ഞ ആറു മാസമായി ഇതിനായി ബോക്സിങ്, മാർഷ്യൽ ആർട്സ് എന്നിവയിലും താരം പരിശീലനം നേടിയിരുന്നു.
ഒരുപിടി സിനിമകളാണ് ഈ വർഷം താരത്തിന്റേതായി പുറത്തിറങ്ങാനിരിക്കുന്നത്. വർഷത്തിൽ ഒരു മലയാള സിനിമ എന്ന തൻ്റെ സിദ്ധാന്തത്തിന് മാറ്റം വരുത്തി ഈ വർഷം മൂന്ന് മലയാള ചിത്രങ്ങൾ പക്കലുണ്ട്. പുതുമുഖ സംവിധായകർക്കാണ് മുൻഗണന നൽകിയിരിക്കുന്നത്. നവാഗതരായ അമൽ കെ ജോബ് സംവിധാനം ചെയ്ത ‘എതിരെ’, ചാൾസ് ജോസഫ് സംവിധനം ചെയ്ത് ‘സമാറാ’ എന്നീ സിനിമകൾ ജൂലായ്, ഓഗസ്റ്റ് മാസങ്ങളിൽ റീലീസ് ചെയ്യും. മറ്റൊരു മലയാള ചിത്രത്തേ കുറിച്ചുള്ള അറിയിപ്പ് ഉടൻ ഉണ്ടാവും.
മണിരത്നം ചിത്രം ‘പൊന്നിയിൻ സെൽവൻ’, നവാഗത സംവിധായകൻ സുബ്ബുറാമിൻ്റെ ‘ അഞ്ചാമൈ’, കാർത്തിക് നരേൻ അണിയിച്ചൊരുക്കന്ന ‘നിറങ്ങൾ മൂൻഡ്ര്’, എന്നിവയാണ് തമിഴിൽ പ്രദർശനത്തിന് ഒരുങ്ങി കൊണ്ടിരിക്കുന്ന റഹ്മാൻ്റെ സിനിമകൾ. വിശാലിൻ്റെ ‘തുപ്പറിവാളൻ 2’, ജയം രവി, റഹ്മാൻ, അർജുൻ മൾട്ടി സ്റ്റാർ ചിത്രം ‘ജന ഗണ മന’ എന്നിവയും പൂർത്തിയായി വരുന്നു. കൂടാതെ പുതിയ രണ്ടു തമിഴ് സിനിമകളിലും റഹ്മാൻ കരാർ ചെയ്യപ്പെട്ടതായാണ് സൂചന. ഒരിടവേളയ്ക്ക് ശേഷം പുത്തനുണർവോടെ വിവിധ ഭാഷാചിത്രങ്ങളിലൂടെ സിനിമയിൽ ശക്തമായൊരു സ്ഥാനം ഉറപ്പിക്കാനുള്ള തയ്യാറെടുപ്പിലാണ് എവർ ഗ്രീൻ സ്റ്റാർ റഹ്മാൻ.
