ഉത്തർപ്രദേശ് നിയമസഭയിലേക്കുള്ള തെരഞ്ഞെടുപ്പിന്റെ ആറാം ഘട്ട വോട്ടെടുപ്പ് ഇന്ന്. യുപി മുഖ്യമന്ത്രി യോഗി ആദിത്യനാഥ്, നിയമസഭ പ്രതിപക്ഷ നേതാവും മുതിർന്ന സമാജ് വാദ് പാർടി നേതാവുമായ രാം കോവിന്ദ് ചൗധരി, മുൻ മന്ത്രി സ്വാമി പ്രസാദ് മൗര്യ തുടങ്ങി നിരവധി മുതിർന്ന നേതാക്കളും മന്ത്രിമാരും ഇന്ന് ജനവിധി തേടും. 10 ജില്ലകളിൽ നിന്നായി 57 നിയമസഭ മണ്ഡലങ്ങളാണ് ഇന്ന് ജനവിധി എഴുതുന്നത്. 676 സ്ഥാനാർഥികളാണ് ആറാംഘട്ടത്തിൽ മത്സര രംഗത്തുള്ളത്. ഗോരഖ്പൂർ, അംബേദ്കർ നഗർ, ബല്ലിയ, ബൽറാംപൂർ, ബസ്തി, ദിയോറിയ, ഖുഷിനഗർ, മഹാരാജ്ഗഞ്ച്, സന്ത് കബീർ നഗർ, സിദ്ധാർത്ഥ് നഗർ എന്നീ പത്ത് ജില്ലകളിലാണ് വോട്ടെടുപ്പ് നടക്കുന്നത്.