സ്വന്തം ജീവന്‍ മറന്ന് മറ്റൊരാള്‍ക്ക് രക്ഷകനായ മുഹമ്മദ് മെഹ്‌ബൂബ് ; കൈയ്യടിച്ച് സോഷ്യൽ മീഡിയ

ഇക്കഴിഞ്ഞ ഫെബ്രുവരി അ‌ഞ്ചിന് ജോലി സ്ഥലത്തേക്ക് പോകുന്നതിനിടെ മുഹമ്മദ് മെഹ്‌ബൂബ് എന്ന മരപ്പണിക്കാരന്‍ അറിഞ്ഞിരുന്നില്ല ഒരു ജീവന്‍ രക്ഷിക്കാനുള്ള നിയോഗം തനിക്ക് മുന്നിലുണ്ടെന്ന്. മദ്ധ്യപ്രദേശിലെ ഭോപ്പാലില്‍ ബാര്‍ക്കെണ്ടിയിലുള്ള ഫാക്ടറിയിലേക്ക് റെയില്‍ പാളത്തിന് അരികിലൂടെ നടക്കുന്നതിനിടെ ട്രെയിന്‍ വരുന്നത് കണ്ട് നടത്തം നിര്‍ത്തി കാത്തു നില്‍ക്കുകയായിരുന്നു മെഹ്‌ബൂബും മറ്റ് കാല്‍നടയാത്രക്കാരും. ട്രെയിന്‍ കടന്നുപോകുന്നതിനായി കാത്തുനില്‍ക്കുന്നതിനിടെയാണ് ഞെട്ടിക്കുന്ന ഒരു കാഴ്ച മെഹ്‌ബൂബ് കാണുന്നത്. അച്ഛനും അമ്മയുമോടൊപ്പം നിന്നിരുന്ന ഒരു പെണ്‍കുട്ടി പെട്ടെന്ന് പാളത്തിലേയ്ക്ക് വീണു.