CrimeNEWS

സ്വകാര്യ വീഡിയോകൾ പുറത്തുവിടുമെന്ന് ഭീഷണിപ്പെടുത്തി അയൽക്കാരിയിൽ നിന്ന് 16 ലക്ഷം തട്ടിയെടുത്ത 17-കാരന്‍ പിടിയിലായി

കഴിഞ്ഞ ദിവസം അലമാരയിൽനിന്ന് പണമെടുക്കുന്നതിനിടെ പെൺകുട്ടിയെ മാതാപിതാക്കൾ പിടികൂടിയതോടെയാണ് അയൽക്കാരന്റെ ഭീഷണിയെക്കുറിച്ച് പുറത്തറിഞ്ഞത്

ഭാംനിയ (മധ്യപ്രദേശ്): പ്രായപൂർത്തിയാകാത്ത പെൺകുട്ടിയുടെ സ്വകാര്യവീഡിയോ സമൂഹമാധ്യമങ്ങളിൽ പ്രചരിപ്പിക്കുമെന്ന് ഭീഷണിപ്പെടുത്തി 16 ലക്ഷം രൂപ തട്ടിയെടുത്ത കൗമാരക്കാരൻ അറസ്റ്റിൽ. മധ്യപ്രദേശിലെ ഭാംനിയ സ്വദേശിയായ പതിനേഴുകാരനാണ് കഴിഞ്ഞ ദിവസം പോലീസ് പിടിയിലായത്.

സ്വകാര്യവീഡിയോ സാമൂഹികമാധ്യമങ്ങളിൽ പ്രചരിപ്പിക്കുമെന്ന ഭീഷണിയെ തുടർന്ന് വീട്ടിൽ സൂക്ഷിച്ചിരുന്ന പണം മാതാപിതാക്കളറിയാതെ പെൺകുട്ടി ഇയാൾക്കു നൽകുകയായിരുന്നു. കഴിഞ്ഞ ദിവസം അലമാരയിൽനിന്ന് പണമെടുക്കുന്നതിനിടെ പെൺകുട്ടിയെ മാതാപിതാക്കൾ പിടികൂടിയതോടെയാണ് അയൽക്കാരന്റെ ഭീഷണിയെക്കുറിച്ച് പുറത്തറിഞ്ഞത്.

പെൺകുട്ടിയുടെ സ്വകാര്യചിത്രങ്ങളും വീഡിയോകളും പകർത്തിയ പതിനേഴുകാരൻ പല ഘട്ടങ്ങളിലായാണ് പണം തട്ടിയതെന്ന് ഭാഡ്ഗോണ്ട പോലീസ് പറഞ്ഞു. പെൺകുട്ടിയുടെ പിതാവ് അടുത്തിടെ ഭൂമി വിറ്റതും ഇതിലൂടെ ഒരുപാട് പണം കിട്ടിയതും പ്രതി അറിഞ്ഞിരുന്നു. ഇക്കാര്യം മനസിലാക്കിയാണ് സ്വകാര്യ വീഡിയോകളുടെ പേരിൽ ഭീഷണി ആരംഭിച്ചത്. തുടർന്ന് കഴിഞ്ഞ മാസങ്ങളിൽ പലതവണയായി പെൺകുട്ടി പണം നൽകി. വീട്ടിൽനിന്ന് ഏകദേശം 16 ലക്ഷം രൂപയാണ് ആരുമറിയാതെ പെൺകുട്ടി പ്രതിക്ക് നൽകിയത്.

അലമാരയിൽ സൂക്ഷിച്ച പണത്തിൽ കുറവുള്ളതായി അടുത്തിടെ മാതാപിതാക്കൾ കണ്ടെത്തി. പെൺകുട്ടിയുടെ പെരുമാറ്റത്തിലും അവർക്ക് സംശയം തോന്നി. പക്ഷേ എങ്ങനെയാണ് പണം മോഷ്ടിച്ചതെന്നു മാത്രം കണ്ടെത്താനായില്ല.

രണ്ടു ദിവസം മുമ്പ് അലമാരയിലെ ലോക്കറിൽനിന്ന് ബാക്കിയുള്ള പണമെല്ലാം മാതാപിതാക്കൾ മറ്റൊരിടത്തേക്ക് മാറ്റി. രണ്ട് ലക്ഷം രൂപ മാത്രം ലോക്കറിൽവെച്ചു. വീട്ടിലുള്ള ആരെങ്കിലും പണം മോഷ്ടിക്കുന്നുണ്ടോ എന്നറിയാനാണ് ഇങ്ങനെ ചെയ്തത്. കഴിഞ്ഞ ദിവസം പെൺകുട്ടി ഇതിൽനിന്ന് ഒരു ലക്ഷം രൂപ മോഷ്ടിച്ചത് മാതാപിതാക്കൾ കൈയോടെ പിടികൂടി.

തുടർന്ന് മകളോട് കാര്യങ്ങൾ ചോദിച്ചപ്പോഴാണ് അയൽക്കാരന്റെ ഭീഷണിയെക്കുറിച്ച് അവൾ വെളിപ്പെടുത്തിയത്. ഇത്തരത്തിൽ 16 ലക്ഷം രൂപ ഇതുവരെ തട്ടിയെടുത്ത കാര്യവും പെൺ കുട്ടി വെളിപ്പെടുത്തി. അങ്ങനെയാണ് മാതാപിതാക്കൾ അയൽക്കാരനായ പതിനേഴുകാരനെതിരേ പോലീസിൽ പരാതി നൽകിയത്.

NewsThen More

Leave a Reply

Your email address will not be published. Required fields are marked *

Back to top button

Adblock Detected

Please consider supporting us by disabling your ad blocker