IndiaNEWS

കമല്‍നാഥ് കോണ്‍ഗ്രസ് അധ്യക്ഷൻ…? സോണിയയെ കണ്ടു

കമൽനാഥ്, ഗാന്ധി കുടുംബവുമായി ഏറെ അടുപ്പമുള്ള നേതാവാണ്. ഒമ്പത് തവണ പാർലമെന്റിലേക്ക് തിരഞ്ഞെടുക്കപ്പെട്ടു

ന്യൂഡൽഹി: അനിശ്ചിതത്വങ്ങൾ അവസാനിക്കുന്നു. മുതിർന്ന കോൺഗ്രസ് നേതാവും മുൻ മധ്യപ്രദേശ് മുഖ്യമന്ത്രിയുമായ കമൽനാഥിനെ അടുത്ത കോൺഗ്രസ് പ്രസിഡൻ്റായി തിരഞ്ഞെടുത്തേക്കുമെന്ന് അഭ്യൂഹം.              ഇന്ന് സോണിയാ ഗാന്ധിയെ ഡൽഹിയിലെ വസതിയിലെത്തി സന്ദർശിച്ചതിനു പിന്നാലെയാണ് അധ്യക്ഷ സ്ഥാനത്തേക്ക് കമൽനാഥ് എത്തുമെന്ന അഭ്യൂഹങ്ങൾ സജീവമായത്.

അടുത്ത അധ്യക്ഷനായി പാർട്ടി പരിഗണിക്കുന്ന മുതിർന്ന നേതാക്കളിൽ കമൽനാഥും ഉൾപ്പെട്ടിരുന്നു. കോൺഗ്രസ് ദേശീയ നേതൃത്വത്തിലെ മാറ്റങ്ങൾ സംബന്ധിച്ച കാര്യങ്ങളാണ് കമൽനാഥ്-സോണിയ കൂടിക്കാഴ്ചയിൽ ചർച്ചയായതെന്നാണ് സൂചന.

      മുൻകേന്ദ്ര മന്ത്രിയായ കമൽനാഥ്, ഗാന്ധി കുടുംബവുമായി ഏറെ അടുപ്പമുള്ള നേതാവാണ്.
ഒമ്പത് തവണ പാർലമെന്റിലേക്ക് തിരഞ്ഞെടുക്കപ്പെട്ടു.

    പാർലമെന്റ് വർഷകാല സമ്മേളനം അവസാനിച്ചതിന് പിന്നാലെ കോൺഗ്രസ്, പുതിയ അധ്യക്ഷനെ തിരഞ്ഞെടുക്കുമെന്നാണ് റിപ്പോർട്ടുകൾ. പാർട്ടി അധ്യക്ഷ സ്ഥാനത്തേക്കുള്ള തിരഞ്ഞെടുപ്പ് മൂന്ന് തവണ മാറ്റിവെച്ചിരുന്നു. ഏറ്റവുമൊടുവിൽ മേയിൽ നടത്താൻ തീരുമാനിച്ച തിരഞ്ഞെടുപ്പ് കോവിഡ് സാഹചര്യത്തിൽ മാറ്റിവയ്ക്കുകയായിരുന്നു.

2019 ലോക്സഭാ തിരഞ്ഞെടുപ്പ് തോൽവിക്ക് പിന്നാലെ രാഹുൽ ഗാന്ധി അധ്യക്ഷ സ്ഥാനം രാജിവെച്ചത് മുതൽ കോൺഗ്രസിൽ പ്രതിസന്ധിയാണ്. 2017ലാണ് രാഹുൽ ഗാന്ധി സോണിയയിൽ നിന്ന് അധ്യക്ഷ പദം ഏറ്റെടുത്തത്.
അധ്യക്ഷ പദവി ഏറ്റെടുക്കാൻ രാഹുൽ വിസമ്മതിച്ചതോടെ പുതിയ അധ്യക്ഷനെ കണ്ടെത്തുന്നതിൽ പാർട്ടി പരാജയപ്പെട്ടു.
പിന്നാലെ സോണിയ ഗാന്ധിയോട് ഇടക്കാല അധ്യക്ഷയായി തുടരാൻ ആവശ്യപ്പെടുകയായിരുന്നു.

അധ്യക്ഷ തിരഞ്ഞെടുപ്പ് വൈകുന്നതിൽ നേതൃത്വത്തെ വിമർശിച്ച് നേരത്തെ പാർട്ടിയിലെ 23 മുതിർന്ന നേതാക്കൾ സോണിയാ ഗാന്ധിക്ക് കത്തയച്ചതും വലിയ വിവാദമായിരുന്നു.

NewsThen More

Leave a Reply

Your email address will not be published. Required fields are marked *

Back to top button

Adblock Detected

Please consider supporting us by disabling your ad blocker