KeralaNEWS

തൃശൂര്‍ പൂരം; പാപ്പാന്‍മാര്‍ക്ക് കോവിഡ് നെഗറ്റീവ് സര്‍ട്ടിഫിക്കേറ്റ് നിര്‍ബന്ധം, അല്ലെങ്കില്‍ ആനകളെ പങ്കെടുപ്പിക്കില്ല

കോവിഡ് കേസുകള്‍ക്കിടയിലും തൃശൂര്‍പൂരത്തിന് കൊടിയേറിയ സാഹചര്യത്തില്‍ പുതിയ നിര്‍ദേശങ്ങളുമായി വനംവകുപ്പ്. പാപ്പാന്‍മാര്‍ കോവിഡ് നെഗറ്റീവ് സര്‍ട്ടിഫിക്കേറ്റ് ഹാജരാക്കണമെന്നും സര്‍ട്ടിഫിക്കേറ്റ് ഉണ്ടെങ്കില്‍ മാത്രമേ ആനകളെ തൃശൂര്‍ പൂരത്തിന് പങ്കെടുക്കാന്‍ അനുവദിക്കൂവെന്നുമാണ് നിര്‍ദേശം. മാത്രമല്ല ആനകളുടെ ഫിറ്റ്‌നസും പരിശോധിക്കും. ഇതിനായി നാല്‍പ്പത് അംഗ സംഘത്തെയാണ് നിയോഗിച്ചിരിക്കുന്നത്.

ഒരു ആനയ്ക്ക് ചുരുങ്ങിയത് മൂന്ന് പാപ്പാന്‍മാരെങ്കിലും ഉണ്ടാകും. മൂന്ന് പേരും നെഗറ്റീവ് സര്‍ട്ടിഫിക്കേറ്റ് ഹാജരാക്കണം. ആരെങ്കിലും ഒരാള്‍ പോസിറ്റീവ് ആയാല്‍ ആനയെ പൂരത്തില്‍ പങ്കെടുപ്പിക്കാന്‍ കഴിയില്ല. മാത്രമല്ല, ഒരാള്‍ പോസിറ്റീവ് ആയാല്‍ മറ്റു പാപ്പാന്‍മാര്‍ ക്വാറന്റീനില്‍ പോകുകയും വേണമെന്നും വനംവകുപ്പ് അറിയിച്ചു.

തൊണ്ണൂറോളം ആനകളാണ് പൂരത്തില്‍ പങ്കെടുക്കുന്നത്. അതേസമയം, ഇന്ന് തൃശൂര്‍ പൂരത്തിന് കൊടിയേറി. തിരുവമ്പാടി ക്ഷേത്രത്തില്‍ രാവിലെ 11.40നായിരുന്നു കൊടിയേറ്റം.പാരമ്പര്യ അവകാശികളില്‍ പെട്ട താഴത്തുപുരക്കല്‍ സുഷിത്താണ് കൊടിമരം ഒരുക്കിയത്. ഭൂമി പൂജക്കുശേഷം തട്ടകക്കാരാണ് കൊടിമരമുയര്‍ത്തിയത്. തന്ത്രി പുലിയന്നൂര്‍ ശങ്കരനാരായണന്‍ നമ്പൂതിരിപ്പാട്, മേല്‍ശാന്തി പൊഴിച്ചൂര്‍ ദിനേശന്‍ എന്നിവരാണ് താന്ത്രിക ചടങ്ങുകള്‍ നടത്തിയത്.

തിരുവമ്പാടിക്ക് പിന്നാലെയാണ് പാറമേക്കാവ് ക്ഷേത്രത്തില്‍ കൊടിയേറ്റ് നടന്നത്. പാരമ്പര്യ അവകാശികളായ ചെമ്പില്‍ കുട്ടന്‍ ആശാരിയാണ് കൊടിമരമൊരുക്കിയത്. തന്ത്രി പുലിയന്നൂര്‍ കൃഷ്ണന്‍ നമ്പൂതിരി, മേല്‍ശാന്തി വടക്കേടത്ത് വാസുദേവന്‍ നമ്പൂതിരി എന്നിവരാണ് താന്ത്രിക ചടങ്ങുകള്‍ നടത്തിയത്. ദേശക്കാര്‍ ചേര്‍ന്നാണ് കൊടിമരമുയര്‍ത്തിയത്.

പാറമേക്കാവിലെ കൊടിയേറ്റിന് ശേഷം പെരുവനം കുട്ടന്‍ മാരാരുടെ നേതൃത്വത്തില്‍ ക്ഷേത്രത്തിന് മുന്നില്‍ മേളവും അരങ്ങേറി. കോവിഡ് സാഹചര്യത്തില്‍ പൂരത്തിന് ഇത്തവണ കര്‍ശന നിയന്ത്രണങ്ങളാണുള്ളത്. 72 മണിക്കൂര്‍ മുന്‍പുള്ള ആര്‍.ടി.പി.സി.ആര്‍ ടെസ്റ്റ് നടത്തിയതിന്റെയോ, വാക്‌സിനെടുത്തതിന്റെയോ സര്‍ട്ടിഫിക്കറ്റുള്ളവര്‍ക്ക് മാത്രമേ പൂരം നടക്കുന്ന തൃശൂര്‍ സ്വരാജ് റൗണ്ടിലും തേക്കിന്‍കാട് മൈതാനിയിലേക്കും പ്രവേശിക്കാനാകൂ.

NewsThen More

Leave a Reply

Your email address will not be published. Required fields are marked *

Back to top button

Adblock Detected

Please consider supporting us by disabling your ad blocker