BusinessNEWS

നവീനും ജാനകിക്കും പിന്തുണ ; ‘Keep Dancing’ ഉള്ളുതണുപ്പിക്കാന്‍ മില്‍മ

തൃശൂര്‍ മെഡിക്കല്‍ കോളജ് വിദ്യാര്‍ഥികളായ നവീന്റേയും ജാനകിയുടേയും ഡാന്‍സ് സോഷ്യല്‍ മീഡിയയില്‍ വൈറലായിരുന്നു. ഇതിനുപിന്നാലെ ഇവര്‍ക്കെതിരെ വര്‍ഗീയത പറഞ്ഞ് അധിക്ഷേപം നടത്താന്‍ ശ്രമം ഉണ്ടായിരുന്നു. ഇരുവരുടേയും പേരിലുള്ള മതപരമായ വേര്‍തിരിവുകള്‍ പറഞ്ഞായിരുന്നു കുറച്ചുപേരുടെ സംഘം ചേര്‍ന്നുള്ള ആക്രമണം. ഇപ്പോഴിതാ നവീനിനും ജാനകിക്കും പിന്തുണ പ്രഖ്യാപിച്ച് രംഗത്തെത്തിയിരിക്കുകയാണ് മില്‍മ.

ഇരവരുടേയും നൃത്തം ചെയ്യുന്ന കാരികേച്ചര്‍ മില്‍മ സ്വന്തം പേജില്‍ ഷെയര്‍ ചെയ്തിരിക്കുകയാണ്. ‘Keep Dancing’ ഉള്ളുതണുപ്പിക്കാന്‍ മില്‍മ എന്ന ഹാഷ്ടാഗോടെയാണ് കമ്പനി ചിത്രം പങ്കുവച്ചിരിക്കുന്നത്. അതേസമയം, ഈ കാരിക്കേച്ചറിന് വന്‍ പിന്തുണയാണ് ലഭിച്ചിരിക്കുന്നത്.

ആനുകാലിക സംഭവങ്ങളുമായി ബന്ധപ്പെട്ട് കാരിക്കേച്ചറുകളിലൂടെ തങ്ങളുടെ അഭിപ്രായം ജനങ്ങളിലേക്ക് എത്തിക്കാന്‍ ശ്രദ്ധിക്കുന്ന അമൂലിന്റെ പാത പിന്തുടരുകയാണ് ഇപ്പോള്‍ മില്‍മയും. ഓരോ വിഷയവും ആരുടെയും ശ്രദ്ധ പിടിച്ചുപറ്റുന്ന വിധത്തിലാണ് മില്‍മ ഇപ്പോള്‍ വിഷയങ്ങള്‍ കൈകാര്യം ചെയ്യുന്നത്. അക്കൂട്ടത്തിലേക്കാണ് നവീനും ജാനകിയും വിഷയമായി മാറിയത്.അതേസമയം, ഇതുമായി ബന്ധപ്പെട്ട് തൃശൂര്‍ മെഡിക്കല്‍ കോളേജിലെ വിദ്യാര്‍ഥികളും ഒരു ക്യാമ്പയിന്‍ തന്നെ ആരംഭിച്ചു. ‘റെസിസ്റ്റ് ഹേറ്റ് ‘എന്ന ക്യാമ്പയിന്റെ ഭാഗമായി കൂടുതല്‍ വിദ്യാര്‍ത്ഥികള്‍ പാട്ടിനൊപ്പം ചുവടുവെച്ചു.

വെറുക്കാന്‍ ആണ് ഉദ്ദേശമെങ്കില്‍ ചെറുക്കാനാണ് തീരുമാനം,ഇവരുടെ പേരുകളിലെ തലയും വാലും തപ്പി പോയാല്‍ കുറച്ചുകൂടി വക കിട്ടും , ഫെയ്‌സ്ബുക്ക് പോസ്റ്റുകള്‍ ഇടാന്‍ എന്ന കുറിപ്പിനൊപ്പം വിദ്യാര്‍ഥികള്‍ തങ്ങളുടെ പേരുകളും പങ്കുവെച്ചിട്ടുണ്ട്. വിദ്യാര്‍ഥികള്‍ക്കൊപ്പം നവീനും ജാനകിയും ചുവട് വച്ചു. സോഷ്യല്‍ മീഡിയയില്‍ നിരവധിപേരാണ് ഈ നൃത്തം ഷെയര്‍ ചെയ്തിരിക്കുന്നത്.

നവീനും ജാനകിയും ഒരുമിച്ച് നൃത്തം ചെയ്യുന്നത് കണ്ട കൃഷ്ണരാജ് എന്ന വക്കീലാണ് ആദ്യം ആരോപണവുമായി രംഗത്ത് വന്നത്. ഈ വിഷയം പിന്നീട് സോഷ്യല്‍ മീഡിയയില്‍ വലിയ ചര്‍ച്ചയായി. നിരവധി പേര്‍ നവീനിനും ജാനകിക്കും പിന്തുണപ്രഖ്യാപിച്ച് രംഗത്ത് എത്തി.

NewsThen More

Leave a Reply

Your email address will not be published. Required fields are marked *

Back to top button

Adblock Detected

Please consider supporting us by disabling your ad blocker