NewsThen Special

“കമലുമായുള്ള ബന്ധം അടഞ്ഞ അധ്യായം… സിമന്റ് കോണ്‍ക്രീറ്റ് ഇട്ട് അടച്ചതാണ് ആ അധ്യായം “: ഗൗതമി

ബിജെപിയിലേക്ക് താന്‍ ഇന്നലെ കടന്നു വന്നതല്ലെന്നും 23 വര്‍ഷം മുമ്പേ എടുത്ത തീരുമാനമാണതെന്നും നടിയും ബി.ജെ.പിയുടെ താരപ്രചാരകയുമായ ഗൗതമി. വാജ്‌പേയുടെയും നരേന്ദ്ര മോദിയുടെയും തേതൃത്വത്തിലുള്ള മതിപ്പാണ് ബി.ജെ.പി ആഭിമുഖ്യത്തിനു കാരണമെന്നും രാജ്യത്തെ നേര്‍ദിശയിലേക്ക് നയിക്കുന്നത് ബി.ജെ.പിയാണെന്നും ഗൗതമി ചൂണ്ടിക്കാട്ടി.

തമിഴ്‌നാട്ടില്‍ ദ്രാവിഡ പാര്‍ട്ടികള്‍ മത്സരിക്കുന്നതു കൊണ്ട് മറ്റ് പാര്‍ട്ടികള്‍ മത്സരിക്കരുതെന്ന് നിയമമൊന്നുമില്ലെന്നും ഗൗതമി പറഞ്ഞു. ഒപ്പം മുന്‍ പങ്കാളി കമല്‍ഹാസന്റെ ‘മക്കള്‍ നീതി മയ്യം’ പാര്‍ട്ടിയോടുള്ള എതിര്‍പ്പും ഗൗതമി വ്യക്തമാക്കി. മാറ്റത്തിനു വേണ്ടിയാണ് മത്സരിക്കുന്നതെന്ന് മക്കള്‍ നീതി മയ്യം പറയുന്നു. എന്നാല്‍ അത് ജനത്തിനു വേണോ എന്ന് തെരഞ്ഞെടുപ്പ് ഫലം വരുമ്പോഴറിയാം. പുതിയ പാര്‍ട്ടി വരുമ്പോള്‍ ജനത്തെ ആകര്‍ഷിക്കാന്‍ ചില മാര്‍ക്കറ്റിംഗ് തന്ത്രം ഇറക്കും. അതാണ് കമല്‍ ഹാസൻ്റെ പാര്‍ട്ടി ചെയ്യുന്നതെന്നും ഗൗതമി പറഞ്ഞു.

കമല്‍ ഹാസനുമായുള്ള ബന്ധം അടഞ്ഞ അധ്യായമാണെന്നും സിമന്റ് കോണ്‍ക്രീറ്റ് ഇട്ട് ആ അധ്യായം അടച്ചെന്നും ഗൗതമി പറഞ്ഞു. കമല്‍ ഹാസനുമായി 11 വര്‍ഷം നീണ്ട ബന്ധം അവസാനിപ്പിച്ച ഗൗതമി ഇപ്പോള്‍ ബി.ജെ.പിയിലെ പ്രമുഖ രാഷ്ട്രീയ സാന്നിധ്യമാണ്.
തമിഴ്‌നാട് നിയമസഭാ തെരഞ്ഞെടുപ്പില്‍ കമല്‍ ഹാസന്‍ വിജയിക്കില്ലെന്ന് നേരത്തെ ഗൗതമി പറഞ്ഞിരുന്നു. സിനിമയിലെ പ്രശസ്തിയും രാഷ്ട്രീയത്തിലെ വിജയവുമായി യാതൊരു ബന്ധവുമില്ലെന്ന് ഗൗതമി അഭിപ്രായപ്പെട്ടിരുന്നു.

വിരുദനഗറില്‍ ഗൗതമി സ്ഥാനാര്‍ത്ഥിയാകുമെന്ന് നേരത്തെ വാര്‍ത്തകള്‍ ഉണ്ടായിരുന്നു. ഇതേ തുടര്‍ന്നാണ് ഗൗതമി അവിടെ പ്രചരണം ആരംഭിച്ചത്. എന്നാല്‍ എന്‍.ഡി.എയുടെ സഖ്യകക്ഷികളായ അണ്ണാ ഡി.എം.കെ സീറ്റ് വിട്ടുകൊടുക്കാന്‍ തയ്യാറായില്ല.

NewsThen More

Leave a Reply

Your email address will not be published. Required fields are marked *

Back to top button

Adblock Detected

Please consider supporting us by disabling your ad blocker