KeralaNEWS

“കൊലക്കേസ് പ്രതിയല്ല ഞാൻ, പേരും ചിത്രവും പ്രസിദ്ധീകരിക്കുന്നതിൽ വിരോധമില്ല…” : വാളയാര്‍ പെണ്‍കുട്ടികളുടെ അമ്മ ഭാഗ്യവതി

തന്റെ ഫോട്ടോയും പേരും മാധ്യമങ്ങളില്‍ പ്രസിദ്ധീകരിക്കുന്നതിൽ വിരോധമില്ലെന്ന് വാളയാര്‍ പെണ്‍കുട്ടികളുടെ അമ്മയും ധര്‍മ്മടത്തെ സ്ഥാനാര്‍ത്ഥിയുമായ ഭാഗ്യവതി. വാളയാര്‍ കേസില്‍ മുഖ്യമന്ത്രി നല്‍കിയ ഉറപ്പുകളൊന്നും നടപ്പാക്കപ്പെട്ടില്ലെന്ന ഭാഗ്യവതി ആരോപിച്ചു.

“മുഖ്യമന്ത്രിയില്‍ നിന്നും എനിക്ക് മൂന്ന് ഉറപ്പുകൾ കിട്ടിയിരുന്നു. മുഴുവന്‍ പ്രതികളെയും അറസ്റ്റ് ചെയ്യും, കേസ് അട്ടിമറിച്ച ഉദ്യോഗസ്ഥര്‍ക്കെതിരെ നടപടി സ്വീകരിക്കും, ഏത് ഏജന്‍സി അന്വേഷിക്കണമെന്ന് കുടുംബം ആവശ്യപ്പെട്ടാലും അതിനൊപ്പം നില്‍ക്കും…” ഇവയായിരുന്നു ആ ഉറപ്പുകൾ. പക്ഷേ അതൊന്നും നടപ്പായില്ലെന്ന് ഭാഗ്യവതി പറയുന്നു. ഉദ്യോഗസ്ഥര്‍ ഡബിള്‍ പ്രമോഷനോടെ ഇപ്പോഴും സര്‍വീസില്‍ ഇരിക്കുകയാണെന്നും ഭാഗ്യവതി ചൂണ്ടിക്കാട്ടി.

ഇടതുസര്‍ക്കാരിനെ തുടക്കം മുതല്‍ വിശ്വസിച്ചിരുന്ന ആളാണ് താനെന്നും എന്നിട്ടും എന്തുകൊണ്ട് നീതി ലഭിച്ചില്ല എന്ന് മനസ്സിലാവുന്നില്ലെന്നും ഭാഗ്യവതി പറഞ്ഞു. “ഇടതുസര്‍ക്കാരിനെ തുടക്കം മുതല്‍ വിശ്വസിച്ചിരുന്ന ആളാണ് ഞാന്‍. സിപിഐഎമ്മിന് വോട്ട് ചെയ്തു കൊണ്ടിരുന്ന വ്യക്തി. അച്യുതാനന്ദന്‍ വീട്ടില്‍ വന്നു പറഞ്ഞു. പിണറായിയെ ചെന്നുകണ്ടു പറഞ്ഞു എന്നിട്ടും എന്തുകൊണ്ട് നീതികിട്ടുന്നില്ല എന്ന് മനസ്സിലാവുന്നില്ല…”
ഭാഗ്യവതി പറയുന്നു.

ധര്‍മ്മടത്ത് മുഖ്യമന്ത്രി പിണറായി വിജയനെതിരെ മത്സരിക്കുന്ന ഭാഗ്യവതിയുടെ തെരഞ്ഞെടുപ്പ് ചിഹ്നം കുഞ്ഞുടുപ്പ് ആണ്. വാളയാര്‍ അമ്മയുടെ തെരഞ്ഞെടുപ്പ് പ്രചരണത്തിന് സംഭാവന അഭ്യര്‍ത്ഥിച്ച് സമൂഹ മാധ്യമങ്ങളില്‍ ക്രൗഡ് ഫണ്ടിങ് ക്യാംപെയ്ന്‍ നടക്കുന്നുണ്ട്.

പ്രായപൂര്‍ത്തിയാകാത്ത തന്റെ മക്കള്‍ ദുരൂഹ സാഹചര്യത്തില്‍ മരിച്ച കേസില്‍ അന്വേഷണം അട്ടിമറിച്ച പൊലീസ് ഉദ്യോഗസ്ഥര്‍ക്കെതിരെ ആഭ്യന്തരവകുപ്പ് നടപടിയെടുക്കാത്തതില്‍ പ്രതിഷേധിച്ച് ഭാഗ്യവതി തലമുണ്ഡനം ചെയ്തത് വലിയ വാര്‍ത്തയായിരുന്നു. ജനുവരി 26 മുതല്‍ പാലക്കാട് വഴിവക്കില്‍ സത്യഗ്രഹ സമരം നടത്തിയിട്ടും നടപടിയെടുക്കാത്തതിനേത്തുടര്‍ന്നാണ് തല മുണ്ഡനം ചെയ്തത്.

NewsThen More

Leave a Reply

Your email address will not be published. Required fields are marked *

Back to top button

Adblock Detected

Please consider supporting us by disabling your ad blocker