KeralaNEWS

അമിത് ഷാ പറഞ്ഞത് എന്റെ സഹോദരനെക്കുറിച്ചാണെങ്കില്‍ അന്വേഷിക്കട്ടെ: കാരാട്ട് റസാഖ് എംഎല്‍എ

സ്വര്‍ണകടത്തുക്കേസുമായി ബന്ധപ്പെട്ട് കേന്ദ്രമന്ത്രി അമിത് ഷാ പറഞ്ഞ ദുരൂഹമരണത്തില്‍ രൂക്ഷവിമര്‍ശനവുമായി കൊടുവള്ളി എംഎല്‍എ കാരാട്ട് റസാഖ്. അമിത്ഷാ പറഞ്ഞ ദുരൂഹമരണം തന്റെ സഹോദരന്റേതാണെങ്കില്‍ അക്കാര്യം അന്വേഷിക്കട്ടെയെന്ന്
റസാഖ് പറഞ്ഞു. മരണത്തില്‍ ദുരൂഹതയുണ്ടെങ്കില്‍ അന്വേഷണത്തിന് കേന്ദ്ര ഏജന്‍സികള്‍ക്ക് അമിത് നിര്‍ദേശം നല്‍കട്ടെ. സഹോദരന്റെ മരണത്തെക്കുറിച്ച് കുടുംബത്തിന് സംശയങ്ങളില്ല. രണ്ടു വര്‍ഷം മുന്‍പാണ് സഹോദരന്‍ മരിച്ചത്. ഇപ്പോള്‍ പറയുന്നത് രാഷ്ട്രീയ ലക്ഷ്യങ്ങള്‍ വച്ചാണ്. അമിത് ഷായുടെ കൈയില്‍ തെളിവുകളുണ്ടെങ്കില്‍ അത് വെളിപ്പെടുത്തട്ടെ. ഉത്തരവാദിത്തപ്പെട്ട ഒരു സ്ഥാനത്തിരിക്കുന്ന ഒരാളാണല്ലോ അങ്ങനെ പറഞ്ഞതെന്നും കാരാട്ട് റസാഖ് പറഞ്ഞു.

ഇന്നലെ മുഖ്യമന്ത്രിയോട് ചോദ്യങ്ങളുന്നയിച്ചപ്പോഴാണ് സ്വര്‍ണക്കടത്തുമായി ബന്ധപ്പെട്ട ഒരു ദുരൂഹമരണം സംസ്ഥാനം അന്വേഷിക്കാത്തതെന്താണെന്ന് അമിത് ഷാ ചോദിച്ചത്. എന്നാല്‍ അമിത് പറഞ്ഞ ദുരഹമരണം ഏതെന്ന് ആലോചിച്ച് തലപുകയുകയാണ് രാഷ്ട്രീയ നേതൃത്വവും അന്വേഷണ ഏജന്‍സികളും. മരണത്തെക്കുറിച്ച് തനിക്ക് അറിയില്ലെന്നാണ് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍ പ്രതികരിച്ചത്. സംശയാസ്പദമായ മരണം സംഭവിച്ചെന്ന് പറഞ്ഞത് അമിത് ഷായാണ്. അതുകൊണ്ട് അദ്ദേഹം തന്നെ കൂടുതല്‍ കാര്യങ്ങള്‍ വിശദീകരിക്കുമെന്നാണ് സുരേന്ദ്രന്‍ പറയുന്നത്.

അതേസമയം, സ്വര്‍ണക്കടത്തും ലൈഫ് മിഷന്‍ കോഴയുമായൊക്കെ ബന്ധപ്പെട്ട് ആരോപണങ്ങളുയര്‍ന്ന മരണങ്ങള്‍ കേന്ദ്രീകരിച്ചാണ് സംശയങ്ങളും ചര്‍ച്ചകളുമെല്ലാം ഉയരുന്നത്. എന്നാല്‍ അവയ്‌ക്കൊന്നും കേസുമായി യാതൊരു ബന്ധവുമില്ലെന്നും അതിനാല്‍ കേന്ദ്ര ആഭ്യന്തര മന്ത്രിയെ ആരെങ്കിലും തെറ്റിദ്ധരിപ്പിച്ചതാകാമെന്നുമാണ് പൊലീസിന്റെ നിലപാട്. എന്തുതന്നെയായാലും അടുത്ത തെരഞ്ഞെടുപ്പ് പ്രചാരണപരിപാടികളില്‍ അമിത് ഷാ തന്നെ വെളിപ്പെടുത്തുമെന്നാണ് ബിജെപി നേതൃത്വങ്ങളുടെ പ്രതീക്ഷ. 2018 ഒക്ടോബറിലാണ് കാരാട്ട് റസാഖിന്റെ സഹോദരന്‍ അബ്ദുള്‍ ഗഫൂര്‍ താമരശേരിയിലുണ്ടായ വാഹനാപകടത്തില്‍ മരിച്ചത്. ഗഫൂറിനൊപ്പമുണ്ടായിരുന്ന രണ്ടു പേര്‍ക്ക് പരുക്കേല്‍ക്കുകയും ചെയ്തിരുന്നു. സംഘം സഞ്ചരിച്ച കാര്‍ ലോറിയുമായി കൂട്ടിയിടിക്കുകയായിരുന്നു.

NewsThen More

Leave a Reply

Your email address will not be published. Required fields are marked *

Back to top button

Adblock Detected

Please consider supporting us by disabling your ad blocker