IndiaNEWS

കെട്ടിവെക്കാൻ കാശില്ല, ആശുപത്രിയ്ക്ക് മുമ്പിൽ മൂന്ന് വയസുകാരി മരണമടഞ്ഞത് സ്റ്റിച്ച് ഇടാത്ത ശസ്ത്രക്രിയാ മുറിവിൽ ഈച്ച അരിച്ച്

വിഷയത്തിൽ അന്വേഷണത്തിന് ഉത്തരവിട്ടിരിക്കുകയാണ് ജില്ലാ മജിസ്‌ട്രേറ്റ്

ഉത്തർപ്രദേശിൽ നിന്നൊരു ദയനീയ വാർത്ത. പ്രയാഗ് രാജിലെ സ്വകാര്യ ആശുപത്രിയ്ക്ക് മുമ്പിൽ കുരുന്നു പിടഞ്ഞ് മരിച്ചത് സ്റ്റിച്ച് ഇടാത്ത ശസ്ത്രക്രിയാ മുറിവിൽ ഈച്ച അരിച്ച്. ബില്ല് അടക്കാൻ മാതാപിതാക്കൾക്ക് ശേഷിയില്ലാത്തതിനാൽ മരണവേളയിലും ശസ്ത്രക്രിയ നടത്തിയതിന്റെ മുറിവ് തുറന്നു തന്നെ ഇരുന്നു.

വിഷയത്തിൽ അന്വേഷണത്തിന് ഉത്തരവിട്ടിരിക്കുകയാണ് ജില്ലാ മജിസ്‌ട്രേറ്റ് ഭാനു ചന്ദ്ര ഗോസ്വാമി. സംഭവത്തിന്റെ വീഡിയോകൾ സോഷ്യൽ മീഡിയയിൽ പടരുകയാണ്.

ദേശീയ ബാലാവകാശ കമ്മീഷൻ വിഷയത്തിൽ റിപ്പോർട്ട് തേടിയിട്ടുണ്ട്. അവഗണന തെളിഞ്ഞാൽ യുനൈറ്റഡ് മെഡിസിറ്റിക്കെതിരെയും ഡോക്ടർമാർക്കെതിരെയും നടപടി ഉണ്ടാകും എന്ന് ബാലാവകാശ കമ്മീഷൻ മുന്നറിയിപ്പ് നൽകിയിട്ടുണ്ട്.

വയറു വേദനയെ തുടർന്നാണ് മൂന്ന് വയസുകാരിയായ മകളെ ബ്രഹ്‌മാദിൻ മിശ്ര ആശുപത്രിയിൽ കൊണ്ടുവന്നത്. ശസ്ത്രക്രിയ വേണമെന്ന് ആശുപത്രി അധികൃതർ പറഞ്ഞതിനെ തുടർന്ന് കടം വാങ്ങി പിതാവ് ഒന്നര ലക്ഷം രൂപ ആശുപത്രിയിൽ കെട്ടിവച്ചു.എന്നാൽ അഞ്ച് ലക്ഷം നൽകാതെ ശസ്ത്രക്രിയ പൂർത്തിയാക്കാൻ ആകില്ലെന്നു ആശുപത്രി അധികൃതർ പറഞ്ഞതായി ബ്രഹ്‌മാദിൻ മിശ്ര പറയുന്നു. കൂടുതൽ പണം നൽകാൻ ഇല്ലാത്തതിനാൽ ശസ്ത്രക്രിയ നടത്തിയിടത്ത് വേണ്ട രീതിയിൽ സ്റ്റിച്ച് പോലും ഇടാതെ ഡിസ്ചാർജ് ചെയ്‌തെന്ന് ബ്രഹ്‌മാദിൻ മിശ്ര ആരോപിക്കുന്നു.

തുടർന്ന് പിതാവ് മറ്റുചില ആശുപത്രികളിൽ പോയെങ്കിലും കുട്ടി ഗുരുതരാവസ്ഥയിൽ ആയതിനാൽ ആരും ഏറ്റെടുക്കാൻ തയ്യാറായില്ല. പിന്നീട് യുനൈറ്റഡ് മെഡിസിറ്റിയിൽ തന്നെ തിരിച്ചു വന്നെങ്കിലും അവർ കൈമലർത്തി.

മൂക്കിലൂടെ കുഴൽ കയറ്റിയ നിലയിൽ വേദന കൊണ്ട് പുളയുന്ന കുട്ടിയെ മടിയിൽ കിടത്തി പിതാവ് കാര്യങ്ങൾ വിശദീകരിക്കുന്ന വീഡിയോ ആണ് പുറത്ത് വന്നിരിക്കുന്നത്.

മറ്റൊരു വിഡിയോയിൽ ഈച്ച അരിക്കുന്ന വ്രണം പിതാവ് വസ്ത്രം മാറ്റി തുറന്നു കാണിക്കുന്നുണ്ട്. വേറൊരു വീഡിയോ കാണിക്കുന്നത് ആശുപത്രി കവാടത്തിൽ മാതാപിതാക്കളുടെ കൈകളിൽ കിടന്നു കുഞ്ഞ് പിടഞ്ഞു മരിക്കുന്നതാണ്.

എന്നാൽ ആരോപണങ്ങൾ ആശുപത്രി നിഷേധിച്ചു. മൂന്ന് ദിവസമായി കുഞ്ഞ് ആശുപത്രിയിൽ ഇല്ലായിരുന്നു എന്നാണ് ആശുപത്രി അധികൃതരുടെ വിശദീകരണം.

NewsThen More

Leave a Reply

Your email address will not be published. Required fields are marked *

Back to top button

Adblock Detected

Please consider supporting us by disabling your ad blocker