KeralaNews

മുഖ്യമന്ത്രിയുമായുള്ള കൂടിക്കാഴ്ച പ്രതീക്ഷ നല്‍കുന്നത് : ഇറോം ശര്‍മിള

തിരുവനന്തപുരം: കേരള മുഖ്യമന്ത്രി പിണറായി വിജയനുമായി നടത്തിയ കൂടിക്കാഴ്ച തനിക്ക് ഏറെ പ്രതീക്ഷ നല്‍കുന്നതാണെന്ന് ഇറോം ശര്‍മിള പറഞ്ഞു. തന്റെ ലക്ഷ്യങ്ങള്‍ക്ക് എല്ലാ പിന്തുണയും നല്‍കുന്നതായി അദ്ദേഹം അറിയിച്ചു. ഉയര്‍ന്ന സാക്ഷരതയ്‌ക്കൊപ്പം ഉയര്‍ന്ന ജനാധിപത്യ ബോധവുമുള്ളവരാണ് കേരളീയരെന്നും അവര്‍ അഭിപ്രായപ്പെട്ടു.ജില്ലാ പത്രപ്രവര്‍ത്തകയൂണിയന്‍ കേസരി ഹാളില്‍ സംഘടിപ്പിച്ച മുഖാമുഖം പരിപാടിയില്‍ സംസാരിക്കുകയായിരുന്നു ഇറോം ശര്‍മിള.

മണിപ്പൂര്‍ ജനത പണസ്വാധീനത്തിലും പേശിബലത്തിലും മയങ്ങിപ്പോയി. സംസ്ഥാനത്തെ സാമൂഹിക യാഥാര്‍ത്ഥ്യങ്ങളെക്കുറിച്ച് ഇനിയും അവര്‍ അറിവു നേടേണ്ടതുണ്ട്. കരിനിയമത്തിനെതിരെ ദീര്‍ഘകാലം താന്‍ പോരാടിയിട്ടും സംസ്ഥാനത്തെ ജനങ്ങള്‍ക്ക് അക്കാര്യം ബോദ്ധ്യപ്പെട്ടില്ല.തിഞ്ഞെടുപ്പു ഫലം വന്നപ്പോള്‍ അതാണ് തനിക്ക് മനസിലായത്. ഇതല്ല അവരില്‍ നിന്ന് താന്‍ പ്രതീക്ഷിച്ചത്. എങ്കിലും തന്റെ പോരാട്ടം അവസാനിപ്പിക്കില്ല, അത് ദീര്‍ഘകാലത്തേക്കുള്ളതാണ്. താന്‍ എതിര്‍ക്കുന്ന നിയമത്തിന്റെ യഥാര്‍ത്ഥ മുഖം ലോകത്തെ മൊത്തത്തില്‍ ബോദ്ധ്യപ്പെടുത്തുകയാണ് ലക്ഷ്യം.

ലോകജനത സന്തോഷവും സങ്കടങ്ങളും പരസ്പരം പങ്കുവയ്ക്കണമെന്ന് താന്‍ ആഗ്രഹിക്കുന്നു. രാഷ്ട്രീയത്തില്‍ തുടരാന്‍ ആഗ്രഹമില്ല, എന്നാല്‍ താന്‍ ആര്‍ജ്ജിച്ച സമരശേഷിയും ആത്മാര്‍ത്ഥതയും ഉത്തരവാദിത്വബോധവും തുടര്‍ന്നും സമൂഹ നന്മയ്ക്കായി ഉപയോഗിക്കും. മണിപ്പൂരില്‍ അധികാരത്തില്‍ വന്ന ബി.ജെ.പി സര്‍ക്കാരിനെക്കുറിച്ച് തനിക്ക് നല്ല അഭിപ്രായമില്ല. ബി.ജെ.പിയും കോണ്‍ഗ്രസും അഴിമതിക്കാരുടെ പാര്‍ട്ടിയാണ്. തിരഞ്ഞെടുപ്പില്‍ സി.പി.എം തനിക്ക് നല്‍കിയ പിന്തുണ വോട്ടുകുറയാന്‍ കാരണമായെന്ന് കരുതുന്നില്ല. താല്‍പര്യമുള്ളവര്‍ സഹായിക്കുന്നതില്‍ സന്തോഷമുണ്ട്. അതിനെ രാഷ്ട്രീയാടിസ്ഥാനത്തില്‍ കാണുന്നില്ല. തന്റെ പ്രവര്‍ത്തനങ്ങള്‍ക്കുള്ള അംഗീകാരമായാണ് കാണുന്നത്.

മണിപ്പൂരില്‍ ഏര്‍പ്പെടുത്തിയ സാമ്ബത്തിക ഉപരോധം പിന്‍വലിച്ചതിനെ സ്വാഗതം ചെയ്യുന്നു. ഉപരോധം പിന്‍വലിച്ചാല്‍ സ്വാഗതം ചെയ്യുമെന്ന് നേരത്തെ വ്യക്തമാക്കിയിരുന്നതാണെന്നും ഇറോംശര്‍മിള പറഞ്ഞു. ഇറോം നേതൃത്വം നല്‍കുന്ന പ്രജാപാര്‍ട്ടി അതിന്റെ പ്രവര്‍ത്തനങ്ങളുമായി മുന്നോട്ടുപോകുമെന്ന് ഒപ്പമുണ്ടായിരുന്ന പാര്‍ട്ടിസെക്രട്ടറി നജ്മാ ബീവി പറഞ്ഞു. അഴിമതിക്കെതിരെയും സമാധാനത്തിനും നീതിക്കും വേണ്ടിയുള്ള പോരാട്ടം അവസാനിപ്പിക്കില്ലെന്നും അവര്‍ വ്യക്തമാക്കി. കേസരി സ്മാരക ട്രസ്റ്റിന്റെ ഉപഹാരം കേരള പത്രപ്രവര്‍ത്തക യൂണിയന്‍ ജില്ലാ സെക്രട്ടറി സി.റഹീം ഇറോം ശര്‍മിളയ്ക്ക് സമ്മാനിച്ചു.

Show More

Related Articles

Leave a Reply

Your email address will not be published. Required fields are marked *

Close